Вазорати корҳои дохилии Ҷумҳурии Тоҷикистон аз муноқишаи оилавие хабар дод, ки марде бародарашро ба корд захмӣ кардааст.

Манбаъ навиштааст, ки 1-уми августи соли равон, тахминан соати 21:30, сокини шаҳри Кӯлоб Ҳидоятулло Зарипов, соли таваллудаш 1985 ҳангоми дар манзили истиқоматиаш қарор доштан бо падар ва модараш муноқиша намуда, бо корди ошхона ба падару модараш таҳдид карда, баъдан бо ҳамин корд ба бародараш Зарипов М., соли таваллудаш 1994, шаш захм, аз ҷумла ба қафаси сина, зери манаҳ, паҳлуи гардан ва оринҷи дасти чап расонидааст.

Гуфта мешавад, ки дар натиҷаи ин ҳодиса ҷабрдида ҷароҳати вазнини ҷисмонӣ бардошта, ба беморхона интиқол дода шуда, таҳти назорати табибон қарор дорад.

ВКД меафзояд, ки Ҳидоятулло Зарипов қаблан бо моддаҳои 200 ва 244 Кодекси ҷиноятии Ҷумҳурии Тоҷикистон суд шудааст.

Dialog.tj