Сайид Аббос Ироқчӣ, вазири корҳои хориҷаи Эрон, гуфтааст, ки Теҳрон аз ҳар ибтикоре, ки сабаби шаклгирии Афғонистони босубот ва эҷоди ҳукумати фарогир дар ин кишвар шавад, ҳимоят мекунад.

Расонаҳои Эрон гузориш додаанд, ки Ироқчӣ, ин мавзуъро дар нишасти вазирони хориҷаи Созмони ҳамкории Шанхай дар Қирғизистон баён кардааст.

Бар асоси гузориш, Ироқчӣ гуфта, ки таҳаввулоти Афғонистон ҳамчунон яке аз муҳимтарин мавзуъҳои муштараки амниятӣ ва тавсеаӣ дар ҳавзаи Созмони ҳамкории Шанхай аст.

Ӯ афзудааст: “Ҷумҳурии Исломии Эрон, бо таваҷҷуҳ ба пайвандҳои таърихӣ, фарҳангӣ ва тамаддунии амиқ бо мардуми Афғонистон…. аз ҳар ибтикоре, ки ба шаклгирии Афғонистони амн, босубот, тавсеаёфта, орӣ аз терроризм ва бархӯрдор аз ҳукумати фарогир сабаб шавад, ҳимоят мекунад”.

Ироқчӣ ҳамчунин, хостори ҳамкорӣ ва ҳамоҳангии кишварҳои минтақа дар мубориза бо терроризм, ифротгароӣ, муҳоҷирати ғайриқонунӣ, қочоқи маводи мухаддир ва чолишҳои инсонӣ дар Афғонистон шудааст.

Ин дар ҳоле аст, ки Теҳрон пас аз тасаллути дубораи гурӯҳи террористии Толибон бар Афғонистон, равобити наздик бо ин гурӯҳ эҷод кардааст.

Dialog.tj