Хоҷа Осиф, вазири дифои Покистон, гуфтааст, ки бо вуҷуди чандин даври гуфтугӯ миёни мақомоти покистонӣ ва гурӯҳи террористии Толибон, Исломобод натавонистааст кафолати хаттӣ дарёфт кунад, ки аз хоки Афғонистон барои анҷоми ҳамлаҳо алайҳи Покистон истифода нахоҳад шуд.

Осиф рӯзи сешанбе, 16-уми июн дар Маҷлиси миллии Покистон гуфтааст, ки мақомоти сиёсӣ, низомӣ ва истихборотии ин кишвар дар солҳои гузашта борҳо бо Толибон вориди гуфтугӯ шудаанд, аммо ин музокирот ба натиҷаи матлуб нарасидааст.

Вай бо радди интиқодҳо, ки гӯё Покистон бо Толибон ҳамкории кофӣ надоштааст, гуфтааст, ки худи ӯ ду бор дар садри ҳайатҳои баландпоя ба Афғонистон сафар кардааст ва дар нишастҳо дар Туркия ва Қатар низ бо мақомоти Толибон дидор доштааст.

Вазири дифои Покистон афзудааст, ки мақомоти Толибон дар ҷараёни музокирот бо бисёре аз пешниҳодҳо мувофиқат карда, аммо аз додани ҳар гуна уҳдадории хаттӣ худдорӣ намудаанд.

Вай гуфтааст, ки Толибон дар яке аз ин гуфтугӯҳо аз Покистон дархости 10 миллиард доллар кумаки молӣ карда ва Исломобод низ омодагии худро барои ҳамкорӣ дар мавриди муқобилият бо гурӯҳҳои мусаллаҳи мустақар дар Афғонистон алайҳи Покистон, нишон додааст.

Осиф таъкид кардааст, ки Покистон омодаи ҳар гуна ҳамкорӣ бо Толибон буда, аммо танҳо хости ин кишвар дарёфти кафолат дар бораи пешгирӣ аз истифодаи хоки Афғонистон барои ҳамла алайҳи Покистон будааст.

Вазири дифои Покистон, ҳамчунин, гуфтааст, ки решаи бисёре аз ҳамлаҳо дар Балучистон ва Хайбар Пахтунхоҳ ба Афғонистони таҳти ҳокимияти Толибон бармегардад ва Исломобод тамоми роҳҳои дипломатиро барои ҷалби ҳамкории Толибон озмудааст.

Вай таъкид кардааст, ки Покистон ҳамчунон аз гуфтугӯ пуштибонӣ мекунад, аммо интизор дорад, ки ҳар гуна музокироти оянда бо натиҷаҳои амалӣ ҳамроҳ бошад.

Dialog.tj