Мақомоти интизомии вилояти Хатлон аз боздошти ду ҷавон хабар дод, ки дар 14 ҳолати ҷинояти дуздӣ гумонбар дониста мешаванд.

Тавре ки раёсати Вазорати корҳои дохилӣ дар вилояти Хатлон хабар медиҳад, чанд сокини ноҳияи Абдураҳмони Ҷомӣ ба Шуъбаи ВКД дар ноҳияи мазкур оид ба аз ҷониби шахсони номаълум дуздида шудани аспҳо, чорвоҳои майда, аз қабили гусфанд, мурғҳои марҷон, харгӯш, асбобҳои сохтмонӣ, кафшергарӣ дастгоҳҳои барқӣ, қутиҳои нигаҳдории занбӯрҳо, дучархаҳо ва дигар ашёҳои рӯзгорашон шикоят намуданд.

Дар натиҷаи санҷиш Нуриддинзода Саидбек Насриддин соли таваллудаш 2001 ва Қурбонзода Асомиддин Ҷамолиддин соли таваллудаш 2000, сокинони деҳаи Хуросони ҷамоати деҳоти Яккатути ноҳияи Абдураҳмони Ҷомӣ бо гумони содир намудани силсиладуздиҳо ва тасарруфи молу мулки ғайр дастгир гардиданд.

Манбаъ меафзояд, ки дар рафти тафтишот муайян карда шуд, номбурдагон бо маслиҳати пешакӣ, аз чанд деҳаи ҷамоати Яккатути ноҳияи Абдураҳмони Ҷомӣ аз набудани атрофиён истифода намуда, ғайриқонунӣ вориди манзилҳои истиқоматӣ гаштаву даст ба дуздии моликияти  шаҳрвандон задаанд. Онҳо дар 14 ҳолати ҷинояти дуздӣ гумонбар дониста шуда, маблағи зарари расонидаашон ба шаҳрвандон тақрибан  90 ҳазор сомониро ташкил медиҳад.

Гуфта мешавад, ки Нуриддинзода С.Н. ва Қурбонзода А.Ҷ. дар ҳабси пешакӣ қарор дошта, нисбати онҳо бо дастрасии моддаи 244 қисми 2-и Кодекси ҷиноятии Ҷумҳурии Тоҷикистон парвандаи ҷиноятӣ оғоз гардидааст.

Dialog.tj