Ҳозим Қосим, сухангӯи ҳаракати Ҳамос, рӯзи ҷумъа гуфт, ки ин гурӯҳ ба иҷрои пурраи марҳилаи нахусти созиши оташбас бо Исроил содиқ аст ва омода мебошад, ки идораи Навори Ғаззаро пас аз анҷоми ҷанг ба мақомоти дигар вогузор кунад.

Ба гузориши шабакаи “Ал-Арбия”, Ҳозим Қосим гуфта, ки бархе аз марҳилаҳои тарҳи пешниҳодии Доналд Трамп, раиси ҷумҳури Иёлоти Муттаҳида, ҳанӯз ниёз ба баррасӣ бо миёнҷиҳост, аммо Ҳамос татбиқи марҳилаи аввалро оғоз кардааст ва барои ҳифзи оташбас бо ҳамаи тарафҳо ҳамкорӣ мекунад.

Ӯ афзуда, ки Ҳамос омода аст аз ҳар гуна нақши иҷроӣ ё идорӣ дар Ғазза канорагирӣ кунад, то заминаи устувор барои ҷилавгирӣ аз бозгашти ҷанг фароҳам шавад. Ба гуфтаи ӯ, Ҳамос намехоҳад ба Исроил баҳонае барои азсаргирии даргирӣ бидиҳад ва аз миёнҷиҳо замонатҳо дар бораи тарҳи Трамп ва пешгирӣ аз эҳёи ҷанг дарёфт кардааст.

Ҳозим Қосим ҳамчунин, дар бораи масъалаи халъи силоҳ гуфт, ки ин мавзуъ дар доираи гуфтугӯҳои дохилии фаластиниён баррасӣ хоҳад шуд. Ӯ силоҳи Ҳамосро “абзори қонунии дифоӣ” номид ва таъкид кард, ки ин гурӯҳ масъулияти миллӣ дорад, то роҳи ҳалли мувофиқ барои ин масъала пайдо кунад.

Сухангӯи Ҳамос аз мақомоти Идораи худгардони Фаластин даъват кард, ки барои ояндаи Ғазза роҳҳалҳои сиёсӣ пешниҳод кунанд ва аз “талошҳои муҳимми” раисҷумҳури ИМА барои иҷрои ин созиш қадрдонӣ намуд.

Ӯ ҳамчунин, аз сахтгирии Исроил дар мавриди рӯйхати баъзе маҳбусони фаластинӣ ва мушкилоти ҷустуҷӯи ҷасадҳои гаравгонон хабар дод ва гуфт, ки комиссияҳои маҳаллии Ҳамос дар Ғазза дар ҳоли ташкили бозгашти оворагон мебошанд. Ба гуфтаи ӯ, Ғазза пас аз ҷанг ба сарзамини вайроншуда табдил ёфтааст ва мардум иҷоза нахоҳанд дод, ки ҳеч нақшаи кӯчонидани маҷбурӣ иҷро шавад.

Дар ҳамин ҳол, манбаъҳои фаластинӣ ба шабакаи “Ал-Арбия” хабар доданд, ки ба зудӣ дар Қоҳира нишасти фарогири гурӯҳҳои фаластинӣ, аз ҷумла Фатҳ ва Ҳамос, баргузор хоҳад шуд, то дар бораи ояндаи Навори Ғазза ва поёни ихтилофҳои сиёсӣ қарор қабул шавад. Ҳадафи ин нишаст барнома‌резӣ барои давраи пас аз ҷанг ва баррасии масъалаи ояндаи Фаластин гуфта мешавад.

Dialog.tj