Рондани электросамокатҳо ва электроскутерҳо то соли 2030 муваққатан манъ карда шуд.

Тавре "Паёми Душанбе" хабар медиҳад, дар асоси қарори Маҷлиси вакилони халқи шаҳри Душанбе, фаъолияти электросамокатҳо, электроскутерҳо ва дигар воситаҳои сайёри инфиродӣ, ба истиснои воситаҳои сайёри инфиродии ба қайди давлатӣ гирифташуда дар роҳҳои автомобилгард ва пиёдагарди ҳудуди шаҳри Душанбе, ба ғайр аз ҷойҳои махсусгардонидашуда то соли 2030 муваққатан манъ карда шуд.

Ҳадаф аз ин тасмим бенизом будани фаъолияти электросамокатҳо ва электроскутерҳо, зиёд шудани садамаҳо бо иштироки онҳо ва халал расондан ба ҳаракати муътадили воситаҳои нақлиёт ва пиёдагардон, риоя накардани талаботҳои бехатарии ҳаракат дар роҳ, инчунин ҷиҳати ҳифзи ҳуқуқу манфиатҳои истифодабарандагони роҳҳои автомобилгард то фароҳам овардани шароити мусоиди инфрасохтори зарурӣ мебошад.

Аз аввали соли ҷорӣ то имрӯз дар ҳудуди шаҳри Душанбе бо иштироки ронандагони скутерҳо ва худравҳои барқӣ (самокат) 26 ҳолати садамаҳои нақлиётӣ ба қайд гирифта шудааст. Дар натиҷаи чунин қоидавайронкуниҳои дағалонаи ҳаракати роҳ, мутаассифона, 3 нафар ҷон бохта, 24 нафари дигар ҷароҳатҳои гуногуни ҷисмонӣ бардоштаанд.

Чанде пеш Раёсати Бозрасии давлатии автомобилӣ дар шаҳри Душанбе “Амалиёти мақсадноки дучархарон “-ро роҳандозӣ намуд, ки дар натиҷаи ин амалиёт нисбати зиёда аз 200 ронандагони дучархаю серчарха ва скутеру худравонакҳои барқӣ протоколҳои ҳуқуқ вайронкунии маъмурӣ тартиб дода шуда, воситаи нақлиёти онҳо ба майдончаи ҷаримавии шуъбаи БДА РВКД дар шаҳри Душанбе барои бартараф кардани камбудиҳо дастрас карда шуданд.

Dialog.tj