Прокуратураи вилояти Киев гурӯҳи шахсонеро боздошт кард, ки шаҳрвандони Ӯзбекистонро ба меҳнати иҷборӣ ҷалб ва истисмор мекарданд. Дар миёни боздоштшудагон ду шаҳрванди Чин, як шаҳрванди Ӯзбекистон ва як зан - шаҳрванди Украина қарор доранд.

Бино ба иттилои прокуратура ин гурӯҳ ба таври ғайриқонунӣ ҷалб, интиқол ва истифодаи меҳнатии 13 шаҳрванди Ӯзбекистонро ташкил кардааст.

Бар асоси иттилои масъулони тафтишот гумонбарон бо истифода аз маҷбуркунӣ ва фиреб шахсони осебпазирро, ки аз набудани манзил, бекорӣ ва вазъи душвори иқтисодӣ ранҷ мебурданд, ҷалб кардаанд. Сипас, онҳоро аз хориҷи Украина ба вилояти Киев интиқол дода, дар шароити ғайринсонӣ ба меҳнати иҷборӣ маҷбур кардаанд.

17-уми сентябр мақомоти ҳифзи ҳуқуқ кофтуковҳои иҷозатдодашударо дар манзилҳо ва муассисаҳои вобаста ба гумонбарон анҷом додаанд. Дар натиҷа утоқҳое ошкор шуданд, ки дар он ҷо 13 шаҳрванди Ӯзбекистон дар шароити ғайринсонӣ нигоҳдорӣ мешуданд. Ҳамчунин, ҳуҷҷатҳо, воситаҳои пулӣ ва нақлиёт мусодира шуданд.

Dialog.tj