Неруҳои мусаллаҳи Исроил бо “чароғи сабз”-и Президенти Амрико Доналд Трамп бо ҳамлҳои ҳавоӣ ва заминӣ амалиёти низомии худро дар минтақаи Навори Ғазза шиддат бахшиданд.

Аз субҳи дирӯз то ба ҳол неруҳои Исроил бо аслиҳаҳои вазнини ҷангӣ амалиёти заминиро оғоз карданд, ки дар пайи ин даҳҳо нафар мардуми ғайринизомии фаластинӣ кушта шудаанд.

Тибқи иттилои расонаҳо дар ҷараёни ҳамлаи ҳавопаймоҳо, чархболҳо ва артиллерия минтақаҳои мухталиф дар Навори Ғазза мавриди ҳадаф қарор гирифтанд. Артиши Исроил мактабаи “Ал-Заҳра”, “Шайх Ридвон”, “Урдугоҳи ал-Шоти”, “Тил ал-Ҳава”, кӯчаи “Ал-Соуқ” дар шаҳри Дейр ал-Балаҳ, маҳаллаи “Ал-Сабра” дар минтақаи ал –Мағрибӣ ва чандин нуқтаҳои дигарро мавриди ҳамлаҳои шадид қарор доданд.

Баъди бомбаборони шадид наҷотдиҳандагон аз зери харобаҳои майдони “Ал-Шава” як хонандаи мактабро берун оварданд ва тақрибан 30 нафари дигар ҳанӯз дар зери харобаҳо боқӣ мондаанд. Дар натиҷаи бомбаборон дар маҳаллаи “Ал-Ходрия” дар ҷануби шаҳри Ғазза дастикам ҳашт нафар кушта шудаанд. Аз зери харобаҳои Ал-Амн ал-Омм дар шимоли шаҳр ҷасади 8 қурбонӣ берун оварда шуда, тақрибан 40 эҳтимолан дар зери харобаҳо қарор доранд.

Dialog.tj