Соҳибёр Толиб, муаллиф ва коргардони филми “Хоби сурх” хабар дод, ки филми мазкур дар ду синамоҷашнвораи байналмилалӣ иштирок хоҳад кард.

Ба қавли коргардони тоҷик, охири моҳи сентябр филми “Хоби сурх” дар синамоҷашнвораи байналмилалии “Бойконур” дар шаҳри Олмотии Қазоқистон ва моҳи октябр дар синамоҷашнвораи байналмилалии “Само” дар Шветсия ба намоиши озмунӣ гузошта мешавад. 

Дар суҳбати кӯтоҳе муаллиф ва коргардони филми “Хоби сурх” Соҳибёр Толиб ба Dialog.tj гуфт, ки то ҳол филми мазкур дар ягон ҷашнвора иштирок накардааст.

“Ҳунарпешаҳои қазоқ дар бораи филми “Хоби сурх” аз расонаҳо маълумот гирифтаанд ва хоҳиш карданд, ки онро бубинанд. Филмро пешниҳод кардем, диданд ва ба ҷашнвора пешбарӣ шуд”, - гуфт Соҳибёр Толиб.

Ҳамчунин, ҳамсуҳбати мо афзуд: “Иштироки филми “Хоби сурх” дар ҷашнвораҳои байналмилали барои таҳиягарон роҳҳои зиёдеро боз мекунад. Аз ҷумла, ҳамкориҳои байналмилалӣ, пайдо кардани сармоя барои таҳия филмҳои нав ва ғайраҳо, ки аз ҳар ҷиҳат хуб аст”.

Чанде пеш дар Душанбе нахустнамоиши филми “Хоби сурх” баргузор гашта буд, ки хабарнигори Dialog.tj пас аз тамошо бо муаллиф ва коргардони он доир ба бурду бохти филм суҳбат намуд. Мусоҳибаро бо линки зер мутолиа намоед: https://dialog.tj/tj/new85001