Тоҷикистон ва Бонки аврупоии таҷдид ва рушд (БАТР) барои солҳои 2026-2030 нақшаи сармоягузорӣ ба маблағи 900 миллион долларро таҳия мекунанд.

Ҷузъиёти ин нақша рӯзи 27-уми октябр дар дидори Пешвои миллат муҳтарам Эмомалӣ Раҳмон бо Маттео Патроне, ноиби президенти БАТР оид ба масъалаҳои бонкӣ дар шаҳри Душанбе баррасӣ шудааст. Дар бораи ҷузъиёти барномаи 900 миллиондолларии Бонки аврупоии таҷдид ва рушд (БАТР) рӯзи 2-юми ноябр сомонаи “Worldnewsam” хабар додааст.

Ин сомона менависад, ки дар ин дидор вазъияти ҳамкориҳои иқтисодӣ ва дурнамои густариши сармоягузории бонкҳо ба иқтисоди кишвар баррасӣ шуданд.

Бар асоси иттилои манбаъ, ҳаҷми умумии сармоягузории БАТР дар Ҷумҳурии Тоҷикистон аз оғози фаъолияташ, аз соли 1993 то кунун аз 1, 1 миллиард евро гузаштааст.

Ҳар ду ҷониб ба ёддошти тафоҳум оид ба таҳияи харитаи роҳи сармоягузорӣ, ки моҳи сентябр аз сӯйи Вазири молияи Ҷумҳурии Тоҷикистон ва Президенти БАТР имзо шуда буд, ишора намуданд.

Президенти Ҷумҳурии Тоҷикистон муҳтарам Эмомалӣ Раҳмон БАТР-ро яке аз шарикони муҳимми кишвар дар рушди иқтисод, инфрасохтор ва бахши хусусӣ номид ва хостори афзоиши маблағгузории мустақим ба корхонаҳои истеҳсолӣ ва пешниҳоди қарзҳои дарозмуддати дастрас ба соҳибкории хурду миёна, бахусус дар минтақа шуд.

Дар ин мулоқот масъалаи додани қарз бо пули миллӣ ва омода намудани ширкатҳои ватанӣ барои баровардани вомбаргҳо низ баррасӣ шудааст.

Ин сомона афзуд, ду ҷониб дар хусуси беҳтар намудани таъминоти аҳолӣ бо оби ошомиданӣ, низоми обҳои партов ва обёрӣ, идоракунии корхонаҳои давлатӣ, лоиҳаҳои шарикии давлат ва бахши хусусӣ, маориф ва рақамикунонӣ гуфтугӯ намуданд.

Расонаи болозикр дар пайи нашри ин хабар арзёбӣ намуд, ки агар харитаи роҳи пешниҳодкардаи Тоҷикистон омалӣ шавад, маблағгузории миёнаи солонаи БАТР ба Тоҷикистон дар панҷ соли оянда тақрибан 180 миллион долларро ташкил хоҳад дод. Ин нисбат ба ҳаҷми қарордодҳои имзошудаи бонк дар соли 2025, ки наздики 103 миллион доллар буд, тақрибан 75 фоиз бештар мебошад.

Dialog.tj