Александр Огородников, сафири ғайримуқими Беларусия дар умури Афғонистон рӯзи яшанбе эътимодномаи худро ба Мулло Ҳасан Охунд, раиси ҳукумати гурӯҳи террористии Толибон супурд.

Дар ҷараёни супурдани эътимоднома, ки дар Арг, қароргоҳи ҳукумати гурӯҳи террористии Толибон доир шуд, Амирхон Мутаққӣ, вазири корҳои хориҷии Толибон низ ҳузур дошт.

Худи Толибон дар як изҳорот таъкид намудаанд, ки Мулло Ҳасан Охунд дар суҳбат бо сафири Беларусия масъалаи густариши ҳамкориҳои дуҷонибаро баррасӣ кардааст. Толибон таъкид кардаанд, ки сафири Беларусия ба рушди робитаҳои иқтисодиву тиҷоратӣ миёни ду кишвар таъкид кардааст.

Сафири Беларусия ҳамчунин, аз сиёсати иқтисодмеҳвари Толибон изҳори қаноатмандӣ намуда, ваъда додааст, ки дар даври маъмурияти худ барои рушди ҳамкориҳои иқтисодиву тиҷоратӣ миёни ду кишвар талош хоҳад кард.

Дар изҳороти Вазорати корҳои хориҷии гурӯҳи террористии Толибон омадааст, ки сафири навтаъини Беларусия эътимодномаи худро ба Амирхон Мутаққӣ низ супурдааст.

Ҷумҳурии Беларусия дар Кобул сафорат надорад ва равобити консулии худ бо Афғонистонро ба воситаи сафорати худ дар шаҳри Тошканд пеш мебарад. Гурӯҳи террористии Толибон низ дар Беларусия намояндагии дипломатӣ надоранд ва корҳои консулии худро аз тариқи сафорати худ дар шаҳри Маскав пеш мебаранд.

Дар моҳҳои охир рафту омади дипломатҳои Толибон ба Беларусия афзоиш ёфтааст.

Хабаргузориҳои Афғонистон қаблан хабар дода буданд, ки гурӯҳи Толибон аз Беларусия таҷҳизоти низомӣ харидорӣ мекунад. Аммо ин иттилоъ аз ҷониби ҳеч манбаи расмӣ тасдиқ нашудааст.

Dialog.tj