20 Ноябр 2026,
ҷумъа, 12:43, Душанбе
10.09.2025 18:16

Суҳроб Усмонов: “Ба намоишҳоямон касеро маҷбурӣ намеорем”

Тӯли чанд моҳ аст, ки дар кишвар Гурӯҳи театрии "Эҳё" ("Ренессанс") фаъол аст. Таъсисдиҳандаи гурӯҳи мазкур Суҳроб Усмонов, саркоргардони Театри опера ва балети ба номи С. Айнӣ мебошад.

Гурӯҳи театрии "Эҳё" ҳунармандони касбӣ ва ҷавонони лаёқатманду санъатдӯстро ҷамъ кардааст, ки ҳадафашон бо шаклу услуби нав намоишҳои хубу диданӣ таҳия намудан аст. Намоишҳои "Эҳё" санъати овозхонӣ, хореография ва унсурҳои театри драмавиро дар худ доранд. Аввалин намоиши таҳиянамудани гурӯҳи театрии мазкур "Король лев" буда, охири апрели соли ҷорӣ манзури тамошобинон гардид.

Dialog.tj бо Суҳроб Усмонов доир ба паҳлӯҳои муҳими фаъолияти "Эҳё" суҳбат кард, ки фишурдааш манзури хонандагон мегардад.

- Чаро лоиҳаи шумо маҳз Гурӯҳи театрии "Эҳё" номгузорӣ шуд?

- Мақсади мо аз таъсиси гурӯҳи мазкур эҳё кардани як самти нави театрист. Мо ба таври таҷрибавӣ кор карда истодаем ва як шакли навро барои тамошобини имрӯз эҳё карданӣ ҳастем. Дар намоишҳои мо чанд жанр бо ҳам омезиш ёфта, як чизи мукаммал ва фарқкунанда тавлид мешавад.

- Дар Гурӯҳи театрии "Эҳё" аз ҳисоби ҳунармандони касбӣ киҳо шомиланд?

  • Дар "Эҳё" ҳам ҳунармандони касбӣ, ба мисли Шарофат Усмонзода, Фарангис Саидзода, Ангелика Тиман, Манучеҳр Рахмонов ва дигарон ва ҳам ҷавононе, ки қадамҳои нахустини худро дар саҳна мегузоранд, шомиланд. Ҳамчунин, бисёр наврасону ҷавонон барои аз худ кардани нозукиҳои пешаи актёрӣ ба мо муроҷиат мекунанд. Дар оянда нақша дорем, ки дар доираи курсе ба хоҳишмандон ҳам санъати актёрӣ ва ҳам овозхониро омӯзонем.

- Чаро намоишҳои шумо дар Театри давлатии академии опера ва балети ба номи Садриддин Айнӣ манзури тамошобинон мегарданд?

-  80 фоизи ҳунарпешаҳои "Эҳё" аз Театри опера ва балет ҳастанд ва дар театри мазкур гузоштани намоишҳо маъноеро дорад, ки ҳунармандон дар хонаи худ, ҷойи кори худ мебошанд. Умуман, дар  Театри опера ва балет гузоштани намоишҳо аз ҳар ҷиҳат мувофиқ аст.

- Намоишҳое, ки шумо таҳия мекунед, бо кадом хусусиятҳояшон аз дигар намоишҳо фарқ мекунанд?

Пеш аз ҳама намоишҳои мо бо жанр ва шаклашон фарқ мекунанд. Тавре ки пештар ишора кардем, мо чанд жанрро бо ҳам муттаҳид карда, намоиш месозем. Ҳамчунин, ба масъалаи либосу саҳнасозӣ диққати ҷиддӣ дода, харҷи зиёд мекунем, то ки аз ҳар ҷиҳат фарқкунанда ва мувофиқ ба намоиш бошад.

- Шумо 11-уми сентябр дар Театри опера ва балет намоиши "Dracula: Любовь сильнее смерти"-ро пешкаши тамошобинон мекунед. Лутфан бигӯед, ки чаро бояд як нафар ин намоишро тамошо кунад, он чӣ паём дорад?

- Намоиши мазкурро бори аввал мо 5-уми июли соли равон пешкаши тамошобинон гардондем. Ин намоиш барои театри тоҷик нав аст, зеро то ҳол дар ҳеҷ театре ба саҳна гузошта нашудааст. Мо ҳис мекунем, ки дар сатҳи ҷаҳонӣ рақобат мекунем, зеро маҳз ҳамин моҳ ду версияи кинои «Дракула» дар кинотеатрҳо ба намоиш гузошта мешавад. Асосан, ин намоиш қиссаи муҳаббат аст, муҳаббати воқеӣ, ки ҳамеша шунавандуву бинанда дорад.

- Охири моҳи август намоиши “Рустам ва Суҳроб”-ро таҳия кардед. Бигӯед, ки тамошобин онро чӣ хел қабул кард?

- Намоиши “Рустам ва Суҳроб”-ро тамошобинон хеле хуб пазируфтанд. Ростӣ, таҳияи ин намоиш барои мо рамзӣ шуд, зеро ҳамон шабу рӯз бо иқдоми Пешвои миллат муҳтарам Эмомалӣ Раҳмон асари “Шоҳнома”-ро ба ҳар оилаи тоҷик туҳфа карданро шурӯъ намуданд.

- Умуман то имрӯз чанд намоишро рӯйи саҳна овардед ва оё онҳо танҳо бо забони русӣ ҳастанд?

- Дар муддати чор моҳ дар доираи лоиҳаи "Эҳё" мо се намоишро ба саҳна гузоштем, ки хушбахтона, аз ҷониби тамошобинон хуб қабул шуданд. Ду намоишамон "Король лев" ва "Дракула" бо забони русӣ ва "Рустам ва Суҳроб" бо забони тоҷикӣ ҳастанд. Дар умум, ман дар Театри опера ва балет 18 намоиш таҳия намудаам.

- Дар постерҳои намоишҳо “Бо дастгирии Вазорати фарҳанги Ҷумҳурии Тоҷикистон” менависед, бигӯед, ки вазорат чӣ гуна кумак мерасонад?

- Албатта, Вазорати фарҳанг моро хеле дастгирӣ мекунад. Хусусан, вазир Матлубахон Сатторӣ, ки ба эшон миннатдории махсус изҳор менамоем. Вақте ки "Эҳё" танҳо идея буд, моро дастгирӣ ва роҳнамоӣ карданд ва ба боварӣ метавон гуфт, ки ин лоиҳа бо дастгирии вазорат амалӣ гардид.

- Гурӯҳи театрии "Эҳё" чӣ гуна сарфу харҷашро мепӯшонад, оё сарпараст дорад?

- Дафтари Швейтсария оид ба  ҳамкорӣ дар Ҷумҳурии Тоҷикистон аз рӯзҳои аввал кумаки молӣ мерасонанд, вагарна мо бидуни сарпарастии онҳо коре карда наметавонистем.

- Аксари ҷавонон пас аз хатм дар театрҳо кор кардан намехоҳанд, вале мебинем, ки дар Гурӯҳи театрии "Эҳё" ҷавонони зиёд кор мекунанд, бигӯед, ки чӣ гуна онҳоро ҷалб кардед ва аз дигар ҷавонони ҳунарманд чӣ фарқ доранд?

- Дар асл мо аз аввал ният доштем, ки барои ҷалби ҷавонон студия таъсис диҳем, аммо то эълон кардани омӯзиш, аз ҷавонони санъатдӯсту лаёқатманд дархости зиёд гирифтем ва онҳоро баррасӣ карда, ҳамкориро оғоз намудем. Медонем, ки намоишҳои мо замонавианд ва ин гуна шакли пешниҳод ба насли нав писанд аст.

- Дар умум, Гурӯҳи театрии "Эҳё" ҳоло чӣ камбудиву мушкилиҳо дорад?

- Мо нақшаи дарозмуддат дорем ва мехоҳем намоишҳои хубу диданӣ таҳия намоем, вале мутаассифона, аз ҷиҳати молӣ каме ноқис ҳастем, зеро сарпарастӣ доимӣ надорем. Албатта, мо дар гурӯҳ ҳунармандони сарсупурдае дорем, ки санъат ва ҳунар барояшон болотар аз ҳама чиз меистад, вале ба ҳар ҳол умед мебандем, ки корҳои бузург карда метавонем.

- Дар замоне ки телефону интернет ҷойи бисёр чизҳоро гирифтааст, оё ҳоло ҳам мухлисони ҳақиқии театрро мебинед?

- Дуруст аст, ки бо технология мубориза бурдан кори осон нест, лекин диққатро ҷалб кардан ба театр, ҳунармандон ва шакли намоиш алоқаи зиёд дорад. Мо кӯшиш мекунем, ки дар театр муҳити зиндаро роҳандозӣ кунем ва беҳтару хубтар будани фазои воқеиро аз вақтгузаронӣ дар олами маҷозӣ баён намоем.

Бисёр театрҳо аз кам будани тамошобинон шикоят мекунанд. Оё тамошобинони намоишҳои шумо зиёданд?

- Шояд каме аҷиб намояд, вале бояд бигӯям, ки дар ин муддати кӯтоҳ намоишҳои "Эҳё" тамошобини худро соҳиб шудаанд. Мо ба намоишҳоямон касеро маҷбурӣ намеорем, балки мардум худашон билет харида, меоянд. Мо аз тамошобинон баҳои хуб мегирем ва ин барои боз ҳам беҳтару хубтар кор кардан ба мо илҳом мебахшад.

Мусоҳиб

Ҳафизуллоҳ Тоҳирӣ 

Хатти хабарҳо

20.11.2026 12:04

Хизматчиёни давлатӣ барои таҳсил дар магистратура ба Ҷопон фиристода мешаванд

Имрӯз, 20-уми ноябр бо мақсади ҷалби бештари довталабон ва интихоби номзадҳои болаёқат аз ҳисоби хизматчиёни давлатӣ барои давраи нави таҳсили солҳои 2027-2029 дар зинаи магистратураи донишгоҳҳои Ҷопон, дар доираи Лоиҳаи пешниҳоди стипендияҳо барои омодасозии кадрҳо (Лоиҳаи JDS) дар Вазорати энергетика ва захираҳои оби Ҷумҳурии Тоҷикистон чорабинӣ гардид.
20.11.2026 09:04

Дар 9 моҳ нақшаи даромади буҷети давлатӣ 114,9 фоиз таъмин гардид

Таҳти раёсати муовини якуми раиси Маҷлиси намояндагони Маҷлиси Олии Ҷумҳурии Тоҷикистон Шермуҳаммад Шоҳиён муҳокимаи парламентӣ «Оид ба иҷрои Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2026» дар 9 моҳи соли 2026» баргузор гардид.
20.11.2026 09:01

Чаро “идеологияи миллӣ” дар паси таблиғоти “диндору бедин” ранг мебозад?

Тоҷикистони имрӯзӣ, ки тақрибан як аср қабл онро кишвари коммунистӣ мешинохтанд, бар асоси идеологияи коммунистӣ ё ба истилоҳи рӯшанфикрони “нав ба исломрасида”-и тоҷик “кишвари атеистӣ” ба ҳайси як давлату миллат дар ҳайати Иттиҳоди Шӯравӣ ташкил карда шуд.
19.11.2026 17:28

Дидори таърихии Трамп, Ҷинпин, Путин ва саволҳои беҷавоб дар бораи Украина

Президенти Иёлоти Муттаҳидаи Амрико, Чин ва Русия дар аввалин нишасти сеҷонибаи “таърихии” худ дар шаҳри Шенҷени Чин масъалаҳои вобаста ба ҷанги Украина, назорати силоҳи атомӣ, амнияти байналмилалӣ ва таъмини бозорҳои ҷаҳонӣ бо захираҳои энергетикиро баррасӣ карданд.
19.11.2026 15:05

Тоҷикистон ташаббуси лоиҳаҳои муштарак барои ҳифзи кӯҳҳо ва чарогоҳҳоро пешниҳод кард

Тоҷикистон бо Қирғизистон ва Ӯзбекистон мехоҳад барои барқарор намудани чарогоҳҳои харобшуда ва ҳифзи экосистемаҳои кӯҳӣ барномаҳои муштарак таҳия кунад. Дар ин барнома таваҷҷуҳи асосӣ ба водии Фарғона ва минтақаҳои кӯҳии атрофи он равона хоҳад шуд.
19.11.2026 15:00

Як сокини маҳаллӣ дар Ӯзбекистон ба гумони додани таълимоти динӣ ба 7 кӯдаки тоҷик боздошт шудааст

Дар вилояти Намангони Ӯзбекистон як сокини маҳаллӣ бо гумони ташкил намудани таълими ғайриқонунии динӣ барои 12 нафар боздошт шудааст. Ҳафт нафари ин кӯдакон аз кишвари Тоҷикистон будаанд. Ин сокини маҳаллӣ барои таълим аз ҳар як кӯдак 100 доллар маблағ мегирифтааст.
19.11.2026 14:54

Вазири қазоқ: Фаъолияти гурӯҳҳои террористӣ дар Афғонистон ва густариши ақидаҳои ифротӣ амнияти Осиёи Марказиро таҳдид мекунанд

Қазоқистон аз ҷомеаи байналмилалӣ хост, ки барои муқобила бо хатарҳои амниятии вобаста ба Афғонистон муттаҳидона чораандешӣ кунанд.
19.11.2026 13:19

СММ: террористон дар Афғонистон ба силоҳҳои тактикӣ дастрасӣ пайдо кардаанд

Гурӯҳҳои террористии фаъол дар хоки Афғонистон ба таҷҳизоти муосири тактикӣ, аз ҷумла паҳбодҳо дастрасӣ пайдо кардаанд. Дар ин бора Александр Зуев, муовини дабири кулли Созмони Милали Муттаҳид оид ба мубориза бо терроризм хабар додааст.