Дар шаҳри Ҷиддаи Арабистони Саудӣ нишасти изтирории вазирони корҳои хориҷии Созмони ҳамкории Исломӣ баргузор шуд, ки дар ин нишаст масъалаи Ғазза баррасӣ шуд.

Вазири корҳои хориҷии Ҷумҳурии Исломии Эрон Сайид Аббос Ироқчӣ дар ин нишаст ҷиноятҳои режими Исроил дар Навори Ғаззаро намунаи рӯшани “наслкушӣ ва поксозии қавмӣ” номида, аз кишварҳои исломӣ даъват кард, ки барои шикастани муҳосираи Ғазза ва расондани кумакҳои башардӯстона иқдомҳои фаврӣ анҷом диҳанд.

Вазири корҳои хориҷии Ҷумҳурии Исломии Эрон дар суханронии худ Ғаззаро “оинаи такондиҳандаи виҷдони ҷаҳонӣ” номида, афзуд, ки мардуми муҳосирашуда бо барномаҳои муназзам кушта мешаванд. Ба гуфтаи ӯ, минтақаҳои маскунӣ вайрон шуда, бемористонҳо ба қабристон табдил ёфтаанд. Ӯ афзуд, ки кӯдакон дар шароити қаҳтӣ ва гуруснагӣ ҷон медиҳанд ва ин вазъият на фақат як ҷанги маъмулӣ, балки “ҷазои ҷамъӣ ва сиёсатҳои наслкушӣ” мебошад.

Сайид Аббос Ироқчӣ бо такя ба ҳуқуқи байналмилалӣ гуфт, ки ба вуҷуд овардани қаҳтӣ, бомбаборон ва кӯчи иҷборӣ дар Ғазза ҷинояти ҷангӣ бар зидди башарият аст. Ӯ афзуд, ки “таърих аз ҷаҳони Ислом хоҳад пурсид, ки оё дар баробари хомӯш кардани нафаси Ғазза бояд яксадо иқдом кард ё мунтазири дигарон монд”.

Вазири корҳои хориҷии Ҷумҳурии Исломии Эрон маҳкумиятҳои бидуни амалро нокофӣ донист ва аз кишварҳои исломӣ хост, то абзорҳои сиёсӣ, иқтисодӣ ва ҳуқуқӣ, аз ҷумла таҳримҳо, байкотҳо ва фишорҳои байналмилалиро истифода кунанд ва ҳамчунин, робитаҳо бо ҳомиёни режими Исроил қатъ карда шавад.

“Ғазза рамзи муқовимат ва шарафи инсонист, ки бо бомба нест намешавад. Ҷаҳони Ислом бояд ба ҳайси як пайкар муттаҳид, ҷасурона дар паҳлӯи мардуми Ғазза истад”- афзуд Ироқчӣ.

Dialog.tj