Гурӯҳи Ҳамос пешниҳод кардааст, ки дар сурати ақибнишинии Исроил аз минтақаҳои мувофиқашуда аз Навори Ғазза ҷангҷӯёнашро хориҷ хоҳад кард.

Гуфта мешавад, ин пешниҳод аз сӯи Ҳамос барои пешниҳод ба Исроил ба ҷониби Миср супорида шудааст. Ҳамос ба зарурати расидан ба тавофуқи хаттӣ бо кафолатҳои байналмилалӣ барои қатъи ҷанг ва пешгирӣ аз ишғоли пурраи Ғазза таъкид намудааст.

Ҳайате бо роҳбарии Халил ал-Ҳайя, яке аз роҳбарони Ҳамос рӯзи чоршанбе, 13-уми август вориди Қоҳира шуд, то бо мақомоти мисрӣ дар хусуси вазъияти Ғазза ва Фаластин гуфтугӯ кунад.

Тоҳир ан-Нуну, яке аз масъулони Ҳамос, ки ҳоло дар Қоҳира ҳузур дорад, гуфт, ки музокирот асосан ба қатъи ҷанг, ворид шудани кумакҳои башардӯстона ва кам кардани ранҷи фаластиниён равона шудааст. Ӯ афзуд, ки масъалаи робита бо Миср низ ҷузъи гуфтугӯҳо хоҳад буд.

Дар ҳамин ҳол, расонаҳои исроилӣ хабар додаанд, ки Миср нақшаи мукаммале ба Ҳамос пешниҳод кардааст, ки дар он озодии ҳамаи гаравгонҳо аз сӯи Исроил ба ивази озодии фаластиниҳо ва қатъи пурраи ҷанг дар Ғазза пешбинӣ шудааст.

Dialog.TJ