Муассисаи давлатии коммуналии “Душанбенақлиётхадамотрасон” хабар дод, ки як ронандаи автобуси хатсайри №43-ро барои вайрон кардани тартиби пардохти электронии роҳкиро ва одоби муошират бо мусофирон муддати 7 рӯз аз фаъолият дур кард.

Дар иттилоияе, ки “Душанбенақлиётхадамотрасон” нашр кардааст, чунин омадааст: “...дар нақлиёти истифодаи умуми пойтахт то ҳануз аз ҷониби баъзе аз ронандагон дидаю дониста тартиби пардохти электронии роҳкиро риоя нагардида, бо ин амалкарди худ норозигии мусофиронро дар ин самт ба миён меорад. Чунин ҳолат 12-уми августи соли ҷорӣ аз ҷониби ронандаи автобуси хатсайри №43, рақами давлатиаш 8234тт05 Камолов Ҳусейн Назарович ба қайд гирифта шуда, амалкарди он аз ҷониби як мусофир сабт ва дар шабакаҳои иҷтимоӣ интишор гардидааст”.

Тибқи гуфтаи манбаъ, аз ҷониби роҳбарияти ККВД "Автобус-3" дар асоси бандҳои дахлдори шартномаи тарафайн, нисбати ронандаи автобуси хатсайри №43, рақами қайди давлатиаш 8234тт05, Камолов Ҳусейн Назарович бинобар сабаби риоя нагардидани низоми пардохти электронии роҳкиро ва одоби муошират, чораҳои интизоми андешида шуда, номбурда муддати 7 рӯз аз фаъолият боздошта шуд. Ҳамчунин ба ронанда огоҳи дода шудааст, ки дар сурати такроран ба чунин камбудиҳо роҳ додан аз кор озод карда мешавад.

Тибқи иттилои Муассисаи давлатии коммуналии “Душанбенақлиётхадамотрасон” аз 11-ум то 17-уми август дар кӯчаву хиёбонҳои Душанбе аз ҷониби гурӯҳи махсус қоидаҳои ҳамлу нақли мусофирон, бехатарии ҳаракат, пардохти электронӣ, либоси ронандагон ва фаъолияти ғайриқонунии таксиронҳо мавриди санҷиш қарор мегирад.

Dialog.TJ