Мақомоти Сурия аз Федератсияи Русия дархост кардаанд, ки мисли даврони Башор Асад неруҳои низомии ин кишвар дар Ҷануби Сурия фаъолияти худро аз сар гиранд. Тибқи иттилои расонаҳо, мақомоти сурӣ мехоҳанд неруҳои Русия мисли давраи қабл, дар минтақаҳои ҷанубии Сурия фаъолияти худро аз сар гирифта, амниятро таъмин намоянд.

Тибқи иттилоъ, чунин иқдом метавонад фаъолияти низомии Исроилро, ки аз моҳи декабри соли гузашта қисми ҷануби Сурияро таҳти назорати худ гирифтааст, маҳдуд созад. Исроил он замон дар минтақаи тасарруфкардааш “минтақаи буферӣ” эълон намуда, онро барои амнияти марзи шимолии худ ва ҳимояи  аҳолии дурӯзӣ муҳим донист.

Расонаҳои арабӣ менависанд, ки Русия барои аввалин бор пас аз сари кор омадани ҳукумати нав гурӯҳе аз низомиёнашро дар қисматҳои шимолу шарқи кишвар, дар наздикии Қамишлӣ мустақар кардааст. Ин иқдом баъди сафари Вазири корҳои хориҷии Сурия Асад аш-Шайбонӣ ба шаҳри Маскав сурат гирифт.

Мақомоти Сурия бар ин боваранд, ки бозгашти низомиёни Русия ба Димишқ метавонад аз дахолати бештари Исроил дар корҳои дохилии Сурия пешгирӣ кунад.

Dialog.tj