Имрӯз, 7-уми август Рустам Мирзозода, раиси Суди Олии Ҷумҳурии Тоҷикистон зимни нишасти матбуотӣ иттилоъ дод, ки дар шаш моҳи аввали соли равон аз ҷониби судҳо дар марҳилаҳои якуми кассатсионӣ ва назоратӣ дар маҷмуъ 73 ҳазору 792 парванда баррасӣ гардид.

Манбаъ афзуд, ки парвандаҳои маданӣ, оилавӣ, ҷиноятӣ, маъмурӣ, дархостҳои мақомоти тафтиши пешакӣ, пешниҳодҳои муассисаҳои ислоҳӣ ва иҷрочиёни Хадамоти мавриди баррасӣ қарор гирифта, ин нишондод дар муқоиса бо ҳамин давраи соли гузашта 20 ҳазору 511 адад кам мебошад.

Дар нишасти мазкур гуфта шуд, ки дар давраи ҳисоботӣ аз ҷониби судҳо 7090 парванда нисбат ба вайронкунандагони Қонуни Ҷумҳурии Тоҷикистон «Дар бораи масъулият барои таълими тарбияи кӯдак» баррасӣ гардид, ки дар натиҷа нисбат ба 5692 нафар ҷарима ба маблағи умумии 4 миллиону 222 ҳазору 771 сомонӣ таъйин шуд.

Ҳамчунин, иттилоъ дода шуд, ки дар ин давра барои вайрон кардани талаботи Қонуни Ҷумҳурии Тоҷикистон «Дар бораи танзими ҷашну маросим дар Ҷумҳурии Тоҷикистон» 630 парвандаи ҳуқуқвайронкунии маъмурӣ баррасӣ шуда, 615 нафар ба маблағи умумии 5 миллиону 155 ҳазору 996 сомонӣ ҷарима карда гардид.

Dialog.tj