Имрӯз, 28-уми июл зимни нишасти хабарӣ масъулини Вазорати маориф ва илми Тоҷикистон иттилоъ доданд, ки дар соли таҳсили гузашта норасоии беш аз 3800 омӯзгор ба қайд гирифта шудааст.

Ба гуфтаи манбаъ, дар мактабҳои кишвар бештар норасоии омӯзгорони фанҳои дақиқ ба назар мерасад.

Дар нишаст гуфта шуд, ки нарасидани кадрҳо дар ҳоли коҳиш аст, яъне дар оғози сол шумораи мазкур 4301 нафарро ташкил дода буд.

Гуфта мешавад, ки ҳоло дар мактабҳои таҳсилоти умумии кишвар 130 ҳазору 732 нафар омӯзгор фаъолият доранд, ки аз ин шумора 86 ҳазору 250 нафарро занон ташкил медиҳанд.

Ҳамчунин, дар нишасти матбуотии Вазорати маориф ва илм иттилоъ дода шуд, ки дар давраи ҳисоботӣ теъдоди муассисаҳои томактабӣ ба 757 адад расида, дар онҳо 118 ҳазор 392 кӯдак таълиму тарбия мегиранд, ки нисбат ба соли 2024  13 муассиса ва 4422 нафар кӯдак зиёд аст.

Зикр гардид, ки дар маҷмуъ, фарогирӣ ба зинаи таҳсилоти томактабӣ 251 ҳазору 753 нафар ё 23,7 фоизро ташкил медиҳад, ки нисбат ба ин давраи соли гузашта 3,5 фоиз зиёд мебошад.

Dialog.tj