20 Ноябр 2026,
ҷумъа, 12:51, Душанбе
25.07.2025 15:27

Дилноза Раҳимӣ: “Вақте ки беқадрии ҳунару ҳунармандро мебинӣ...”

Дилноза Раҳимӣ, хатмкардаи риштаи актёрии Донишкадаи фарҳанг ва санъати Тоҷикистон ба номи Мирзо Турсунзода аст. Ӯ дар саҳнаи театр хеле зуд маъруф гардид. Бо вуҷуди ҷавон буданаш, аз худ ҳамчун ҳунарпешаи ояндадор ва хеле сарсупурдаи ин пешаи заҳматталаб дарак медод. Маълум буд, ки мавсуф аз таҳти дил касбашро дӯст медорад ва бо дилу ҷон кор кардан мехоҳад. Ҳамчунин, дар муддати кӯтоҳ дар соҳаи блогинг ҳам шинохта шуд. Бо саҳнаҳои тарбиявию иҷтимоияш диққати садҳо ҳазор корбари фазои маҷозиро ҷалб кард.

Вале кори театрро тарк кард...

Дар блогинг камфаъол шуд...

Наворҳояшро аз саҳифааш тоза намуд...

Dialog.tj ба суроғи Дилноза Раҳимӣ рафт, то ки ба саволҳои бешумораш посух бигирад.

ҲИССАИ ЯКУМ:

ИМРӮЗ

- Имрӯз пайи кадом корҳоед?

- Имрӯзҳо модарам беморанд ва қисми зиёди вақтам ба нигоҳубину назорати он кас мегузарад. Ҳамчунин, ба тамрини филми таърихии Тоҷикистону Ӯзбекистон – “Ҷоми ва Навоӣ” машғул ҳастам.

- Мушоҳида кардем, ки ҳама наворҳои  тарбиявиву иҷтимоиро, ки бо блогерони машҳур таҳияи карда будед, аз саҳифаатон пок кардаед, ин чӣ сабаб дошта метавонад?

- Дуруст аст, як сол мешавад, ки ҳама наворҳои саҳифаамро тоза кардам. Аслан, сабабҳо зиёданд, вале аз ҳама асос ин дилмондагӣ аз касбу корам аст. Ман қабул дорам, ки блогер нестам, балки ҳамчун ҳунарпеша дар наворҳои блогерон иштирок мекардам ва вақте ки дилхунукиро эҳсос кардам, дигар на нақшофарӣ хостаму на будани онҳоро.

Ҳоло фикр мекунам, ки рӯз аз рӯз одам инсонтар мешудааст ва бисёр чизҳоро дарк менамудааст. Маҳз зиёд шудани дарку фаҳмиш моро тағйир медиҳад ва намегузорад, ки ҳар кори нахостаамонро анҷом диҳем.

- Мутаассифона, бархе корбарони шабакаҳои иҷтимоӣ то ин ҳад аз ахлоқу одамгарӣ дур шудаанд, ки  ҳар сухане, ки хоҳанд мегӯянд. Оё ин омил шуморо нигарон намекунад?

- Ин ҳолат маро нигарон мекунад, вале ростӣ, дар ин маврид чизе гуфтан намехоҳам, зеро одаме, ки аз оила, аз волидон тарбия нагирад, ба гуфтаҳои мо, ба наворҳои тарбиявии мо, ба бархе ҷазодиҳиҳо низ ислоҳ намешавад. Дар ин росто, ман ба фикре ҳастам, ки чунинҳоро бояд аҳамият намедиҳем, чунки маҳз таваҷҷуҳи мо метавонад барои онҳо муфид бошад.

ҲИССАИ ДУЮМ:

ДИЛМОНДАГӢ ВА ТАРКИ ТЕАТР

- То чанде пеш шумо яке аз дурахшонтарин ҳунарпешаҳои театри тоҷик будед. Зеро ҳам дар театр хеле фаъол будед ва ҳам ин даргоҳи адабро дар фазои маҷозӣ тарғиб мекардед. Сабаби аз театр рафтанатон чист?

- Пешопеш мегӯям, ки аз касе хафа нестам, вале вақте ки эҳтиром ба касбу соҳибкасб дар коргоҳ намемонад, беҳтар аст, ки тарки он ҷо кунӣ. Бар замми шароити хуби корӣ набудан, барои мисол, нақши харгӯшро бо либоси рӯбоҳ бозидан, боз беҳурматӣ ва беқадрии ҳунарро дида, кас дилхунук мегардад. Ман боз мегӯям, аз касе хафа нестам, вале набояд ҷавононро, махсусан ҷавононе, ки касбашонро дӯст дошта, интихоб кардаанд ва аз рӯи он кор кардан мехоҳанд, то ин ҳад дилхунук кунанд. 

- Оё тасмими аз театр дур шудан бароятон душвор набуд?

- Хеле душвор буд. Ман касбу корамро дӯст медорам, вале вақте ки эҳтиром намебинӣ дигар чизеро фикр намекунӣ. Ҳатто баъди аз театр рафтан ҳам муддате ноором будам, зеро барои касе, ки касбашро дӯст дошта интихоб кардааст ва муддате фаъолият намудааст, тарки он кардан осон нест. Махсусан, кори эҷодӣ хеле мушкил аст. Бовар мекунед, ҳоло ҳам баъзе пораҳоро аз намоишҳое, ки бозӣ кардаам назди оина худ ба худ бозӣ мекунам ва ба худ мегӯям, ки фалон нақшро беҳтар иҷро кардан мумкин буд.

- Аз театр рафтанатонро устодонатон Қурбони Собир ва Нозими Мелик чӣ гуна қабул карданд?

- Албатте, ҳеҷ устод намехоҳад, ки шогирдаш аз касбаш дур шавад, вале устодони ман сабаби аз театр рафтанамро аз хомӯшиам фаҳмиданд. Дар ин муддат устод Нозими Мелик ду маротиба пурсиданд, ки кай ба кор бармегардам, зеро он кас болои намоише кор карда истодаанд. Аммо дигар намехостам, чунки барои об шудани яхҳои дилам офтобе лозим буд ва он лаҳза ҳеҷ гармиеро эҳсос намекардам.

- Ин рафтани шумо муваққатист ё рӯзе бармегардед?

- Ҳоло ҳеҷ чиз гуфта наметавонам. Дар оянда фазову муҳити театрро мебинам ва агар оиладор шавам, ризояти ҳамсарамро ҳам бояд гирам. Хуллас, агар Худо хоҳад боз бармегардам. Ва агар баргаштанам шавад, албатта, интихоби якумам Театри Лоҳутӣ аст.

- Ба андешаи шумо дар замоне ки телефону интернет мақоми театру телевизионро танг кард, чӣ гуна театр ва ҳунармандон метавонанд ба ҷомеа таъсиргузор бошанд?

- Театру синамо алоқамандони худро доранд ва таъсиргузор ҳастанд. Вале камбудии асосӣ дар он аст, ки театру синамои тоҷик тарғиб намешавад. Мардум ноогоҳ мемонанд, ки дар театр намоише буд ё дар кинотеатр филме гузошта шуд. Ёд дорам, ки вақте дар театр кор мекардам, пеш аз ҳар намоиш дар Инстаграм хабар медодам ва толор пур аз тамошобин мешуд.

ҲИССАИ СЕЮМ:

ПОРАҲОИ ҲАЁТ

- Баъзан ҳикоягунаҳое дар саҳифаи фейсбукиатон нашр мекунед. Бигӯед, ки дар ин соҳа кӣ ё киҳо шуморо роҳнамоӣ мекунанд?

- Ҳар чизе, ки дар Фейсбук менависам, ҳодисаву имтиҳонҳое ҳастанд, ки аз сар гузаронидам ва дар ин роҳ роҳнамое надорам. Онҳо дардҳои мананд, саргузашти мананд, имтиҳонҳои мананд. Ман ба ҳар шебу фарози зиндагӣ диққат медиҳам ва ҳар дору нодорро аз Худованд медонам. Кӯшиш мекунам, ки сабаби сар задани баъзе ноҷуриҳоро дарк кунам ва ба неъматҳо шукр гӯям. Навиштаҳоям воқеиянд ва тавре худатон медонед, қаламбадастон баъзе ҷойҳоро серранг мекунанд, баъзеи дигарро камранг, то ки матлаб хубтару ҷаззобтар барояд.

- Чанде пеш гуфта будед, ки навиштаҳоятонро ҷамъ карда, дар шакли китоб нашр мекунед, ин кор дар кадом сатҳ қарор дорад?

- Ман бисёр мехостам, ки ҳар чи зудтар маҷмӯаи қиссаҳоямро, ки пораҳои ҳаёти ман ҳастанд, нашр кунам. Аммо дарҳамбарҳамиҳои зиндагӣ ба ман имкон намедиҳанд, ки ин корро анҷом диҳам.

- Ба воситаи қиссаҳоятон чӣ гуфтан мехоҳед?

- Дар онҳо чӣ гуна худшиносу Худошинос шудани ман дарҷ гардидааст ва ба воситаи онҳо гуфтан мехоҳам, ки одамон шириниву рангинии зиндагиро эҳсос кунанд. Гила накунанд, балки аз ҳар лаҳзаи зиндагӣ ҳаловат баранд ва барои хушбахт будану хушбахтона зистан кӯшиш намоянд.

- Бисёриҳо барои навиштан матлаб доранд, аммо бо сабабҳои гуногун, аз ҷумла ҳавсала надоштан, наменависанд. Бигӯед, ки шуморо чӣ водор месозад, ки нависед?

- Дар бораи ҳавсала бояд бигӯям, ки аз синфи чорумиам дафтари хотира дорам ва хотираҳоямро қайд мекунам. Навиштан ва аз навиштан таскин ёфтан ба ман аз падарам мерос мондааст. Он кас ҳам қалами хуб доштанд ва дафтари хотираашон ҳоло дар дасти ман аст. Навиштан барои ман ин шуғли дӯстдошта аст ва ин корро дӯст медорам.

- Навиштан шуморо таскин медиҳад?

- Бале, навиштан таскини дилам аст. Вақте ки пасту баландиҳои зиндагиро бори дигар ба ёд оварда, менависам, шукр мекунам, аз зиндагӣ лаззат мебарам ва кӯшиш мекунам, ки ҳаррӯз беҳтар зиндагӣ кунам. 

- Аз таҳти дил нависанда шуданӣ ҳастед ё навиштан муваққатист?

- Ман аз таҳти дил менависам. То куҷо нависанда мешавам ва то куҷо эътироф мешавам, дигар ба ман вобаста нест. Аммо то ҳастам кӯшиш мекунам, ки пораҳои ҳаётамро нависам.

- Ташаккур барои суҳбати ошкоро.

- Саломат бошед.

Мусоҳиб

Ҳафизуллоҳ ТОҲИРӢ

Хатти хабарҳо

20.11.2026 12:04

Хизматчиёни давлатӣ барои таҳсил дар магистратура ба Ҷопон фиристода мешаванд

Имрӯз, 20-уми ноябр бо мақсади ҷалби бештари довталабон ва интихоби номзадҳои болаёқат аз ҳисоби хизматчиёни давлатӣ барои давраи нави таҳсили солҳои 2027-2029 дар зинаи магистратураи донишгоҳҳои Ҷопон, дар доираи Лоиҳаи пешниҳоди стипендияҳо барои омодасозии кадрҳо (Лоиҳаи JDS) дар Вазорати энергетика ва захираҳои оби Ҷумҳурии Тоҷикистон чорабинӣ гардид.
20.11.2026 09:04

Дар 9 моҳ нақшаи даромади буҷети давлатӣ 114,9 фоиз таъмин гардид

Таҳти раёсати муовини якуми раиси Маҷлиси намояндагони Маҷлиси Олии Ҷумҳурии Тоҷикистон Шермуҳаммад Шоҳиён муҳокимаи парламентӣ «Оид ба иҷрои Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2026» дар 9 моҳи соли 2026» баргузор гардид.
20.11.2026 09:01

Чаро “идеологияи миллӣ” дар паси таблиғоти “диндору бедин” ранг мебозад?

Тоҷикистони имрӯзӣ, ки тақрибан як аср қабл онро кишвари коммунистӣ мешинохтанд, бар асоси идеологияи коммунистӣ ё ба истилоҳи рӯшанфикрони “нав ба исломрасида”-и тоҷик “кишвари атеистӣ” ба ҳайси як давлату миллат дар ҳайати Иттиҳоди Шӯравӣ ташкил карда шуд.
19.11.2026 17:28

Дидори таърихии Трамп, Ҷинпин, Путин ва саволҳои беҷавоб дар бораи Украина

Президенти Иёлоти Муттаҳидаи Амрико, Чин ва Русия дар аввалин нишасти сеҷонибаи “таърихии” худ дар шаҳри Шенҷени Чин масъалаҳои вобаста ба ҷанги Украина, назорати силоҳи атомӣ, амнияти байналмилалӣ ва таъмини бозорҳои ҷаҳонӣ бо захираҳои энергетикиро баррасӣ карданд.
19.11.2026 15:05

Тоҷикистон ташаббуси лоиҳаҳои муштарак барои ҳифзи кӯҳҳо ва чарогоҳҳоро пешниҳод кард

Тоҷикистон бо Қирғизистон ва Ӯзбекистон мехоҳад барои барқарор намудани чарогоҳҳои харобшуда ва ҳифзи экосистемаҳои кӯҳӣ барномаҳои муштарак таҳия кунад. Дар ин барнома таваҷҷуҳи асосӣ ба водии Фарғона ва минтақаҳои кӯҳии атрофи он равона хоҳад шуд.
19.11.2026 15:00

Як сокини маҳаллӣ дар Ӯзбекистон ба гумони додани таълимоти динӣ ба 7 кӯдаки тоҷик боздошт шудааст

Дар вилояти Намангони Ӯзбекистон як сокини маҳаллӣ бо гумони ташкил намудани таълими ғайриқонунии динӣ барои 12 нафар боздошт шудааст. Ҳафт нафари ин кӯдакон аз кишвари Тоҷикистон будаанд. Ин сокини маҳаллӣ барои таълим аз ҳар як кӯдак 100 доллар маблағ мегирифтааст.
19.11.2026 14:54

Вазири қазоқ: Фаъолияти гурӯҳҳои террористӣ дар Афғонистон ва густариши ақидаҳои ифротӣ амнияти Осиёи Марказиро таҳдид мекунанд

Қазоқистон аз ҷомеаи байналмилалӣ хост, ки барои муқобила бо хатарҳои амниятии вобаста ба Афғонистон муттаҳидона чораандешӣ кунанд.
19.11.2026 13:19

СММ: террористон дар Афғонистон ба силоҳҳои тактикӣ дастрасӣ пайдо кардаанд

Гурӯҳҳои террористии фаъол дар хоки Афғонистон ба таҷҳизоти муосири тактикӣ, аз ҷумла паҳбодҳо дастрасӣ пайдо кардаанд. Дар ин бора Александр Зуев, муовини дабири кулли Созмони Милали Муттаҳид оид ба мубориза бо терроризм хабар додааст.