Исроил Катс, Вазири мудофеаи Исроил дар нишасти арзёбии ниҳодҳои низомии кишвараш гуфт, эҳтимоли оғози ҳамлаи дубораи Исроил ба Эрон вуҷуд дорад: "Исроил барои пешгирӣ аз эҳёи барномаҳои атомӣ ва мушакии Эрон бояд нақшаи рӯшан дошта бошад".

Ба навиштаи расонаҳои исроилӣ дар ин нишаст, ки бо ҳузури роҳбарони артиши Исроил, аз ҷумла Эял Замин, сардори ситоди кулл, муовини ӯ, Тамир Ядоӣ ва намояндагони Моссад ва амнияти дохилии Шин Бет доир шуд, Исроил Кат гуфт “идомаи амалиёти низомӣ бар зидди Эрон” аз эҳтимол дур нест.

Ӯ афзуд, ки ҳадафи аслии ҷанг дар Ғазза “озод кардани ҳамаи гаравгонҳо ва нобудии комили Ҳамос” аст.

Исроил Катс Эронро бо ҳамлаи эҳтимолии дигар таҳдид кард ва гуфт, ки сиёсатҳои таҷовузгаронаи Исроил дар Яман, Сурия ва Лубнон то ба имрӯз муваффақона иҷро шудаанд. Ба гуфтаи ӯ, ҳузури неруҳои артиши Исроил дар нуқтаҳои муҳимми амниятӣ дар қаламрави Сурия ва Лубнон барои дифоъ аз амнияти миллӣ “ҳаётӣ” мебошад.

Аз ҷониби дигар Доналд Трамп, Президенти Иёлоти Муттаҳидаи Амрико дар як посухи кӯтоҳ дар шабакаҳои иҷтимоӣ ба изҳороти ахири Аббос Ироқчӣ, Вазири корҳои хориҷии Ҷумҳурии Исломии Эрон, ки гуфт муассисаҳои атомии Эрон дар зарбаҳои ҳавоии Амрико осеб дидаанд, ишора намуда, афзуд: “Албатта, ҳамин тавр аст. Тавре ман қаблан гуфта будам. Агар лозим шавад, боз ин корро мекунем”.

Дар ҳамин ҳол, рӯзномаи "Jerusalem Post" ба нақл аз ду сарчашмаи огоҳ навишт, Доналд Трамп дар гуфтугӯҳои хусусии ахир гуфт, ки Вашингтон дигар талош намекунад, ки Эронро вориди музокирати атомӣ кунад.

“Агар онҳо худашон биоянд, мо истиқбол мекунем, вале наметалабем ва фишор намеорем”- гуфт Доналд Трамп.

Ин ҳарфҳо дар ҳолест, ки дар давраи аввали президентии худ Доналд Трамп талошҳои зиёд барои даргир кардани Эрон дар музокироти нав анҷом дода буд. Ӯ ҳамеша таъкид мекард, ки ҳар гуна созиш бо Эрон бояд шомили манъи комили ғанисозии уран аз сӯи ин кишвар бошад.

Dialog.TJ