Хабарҳои зидду нақиз дар расонаҳои арабӣ дар бораи Аҳмад Шаръ, раҳбари кунунии ҳукумати Сурия нашр мешавад. Ин хабарҳо вокунишҳои густурдаи дохилӣ ва байналмилалиро ба вуҷуд овардааст.

Тибқи иттилоъ, Аҳмад Шаръ, маъруф ба Ҷӯлонӣ аз шаҳри Димишқ бо аъзои хонаводааш фирор кардааст. 

Дар ҳамин ҳол, расонаҳо гузориш доданд, ки гурӯҳҳои мусаллаҳ назорати радиову телевизиони давлатии Сурияро ба даст гирифтаанд.

Ин дар ҳолест, ки чанде пеш шабакаи Ал-Ҷазира, гузориши миннатдории ӯ аз амири Қатарро ба хотири “нақшаш дар таъмини субот ва амният дар Сурия” нашр кард.

Ба навиштаи расонаи “Ал-Маёдин” дар як амалиёти тарҳрезишудаи террор, се узви аршади ҳукумати Ҷӯлонӣ, аз ҷумла Мураҳф Абуқусра, вазири дифоъ кушта шудаанд. Тафсилоти бештари ин ҳамла то ҳол дар расонаҳо чоп нашудааст.

Дар пайи ин нооромӣ Шурои олии қабилаҳои араб дар Сурия ба таври расмӣ фарохони умумӣ эълон карда, аз тамоми қабилаҳо дар вилояти Сунай ва дигар минтақаҳо даъват кардааст, ки ба сӯи Сувайдо, минтақаи аҳолинишинӣ дарузӣ ҳаракат кунанд.

Ин Шуро ба нашри як изҳорот гуфт: “Мо, фарзандони қабилаҳои Сурия бо нигаронии амиқ қатлу куштор ва ҷиноятҳои таҷовуз бар зидди қабилаҳои араб дар Сувайдоро пайгирӣ мекунем”.

Шабакаи Ал-Арабия хабар дод, беш аз 50 ҳазор нафар аз неруҳои қабилаҳои араб акнун дар роҳи Сувайдо қарор доранд ва даҳҳо ҳазор нафари дигар дар чанд соати оянда ба марзҳои он мерасанд. Ҳамчунин, гуфта мешавад, ки қавмҳое аз Ироқ, Урдун ва Лубнон низ омодаи пайвастан ба ин ҳаракат ҳастанд.

Рӯзи гузашта дар пайи ҳамлаи неруҳои вобаста ба Шайхи дарузӣ - Ҳикмат ал-Ҳиҷрӣ, беш аз 100 нафар кушта ва ҳазорҳо тан аз сокинони қабилаҳои арабӣ иҷборан тарки манзил кардаанд.

Дар ҳамин ҳол, барқ, интернет ва иртиботи мобилӣ дар тамоми вилояти Сувайдо қатъ шудааст. Манобеъ мегӯянд, эҳтимолан дар ҳоли таҳияи амалиёти бузурги низомӣ ҳастанд, ки метавонад вазъиятро дар минтақа ба сатҳи ҷанги фарогир бикашад.

Расонаҳо ҳамзамон аз парвози ҳавопаймоҳои ҷангии Исроил аз болои осмони ҷануби Сурия, бахусус вилояти Сувайдо хабар медиҳанд. Дронҳо ва ҳавопаймоҳои ҷангии Исроил ҳамлаҳое бар зидди неруҳои қабилаҳои арабӣ анҷом додаанд.

Ба навиштаи расонаҳо қабилаҳо иддао доранд, ки бахшҳои муҳимми маркази Сувайдо ҳамакнун дар зери назорати онҳо қарор дорад.

Dialog.tj