Дар ҷаласа ҳайати мушовараи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон фаъолияти вазорат ва зерсохторҳои он дар шашмоҳаи аввали соли 2025 таҳлилу баррасӣ гардид.

Тавре ки маркази матбуоти вазорат хабар медиҳад, дар шаш моҳи аввали соли равон аз тамоми сарчашмаҳо дар ҷумҳурӣ 30 адад муассисаи тандурустӣ сохта ба истифода дода шуда, инчунин 115 адад муассисаи тандурустӣ таъмир гардиданд, ки ҷиҳати дастрасии бештар ба хизматрасониҳои тиббӣ ба аҳолии шаҳру ноҳияҳои ҷумҳурӣ мусоидат менамоянд.

Гуфта мешавад, ки дар давраи ҳисоботӣ 192 нафар мутахассис дар муассисаҳои таълимию илмии хориҷи кишвар барои гузаштани курсҳои омӯзишӣ ва ба зинаи аспирантура, докторантура, коромӯзӣ, гузаштани марҳилаи ординатураи клиникӣ аз ҳисоби Стипендияи байналмилалии Президенти Ҷумҳурии Тоҷикистон «Дурахшандагон» (22 нафар) фаро гирифта шуданд, ки нисбат ба соли гузашта (187 нафар) 5 нафар зиёд мебошад. 

Ҳамчунин, дар ҷаласаи мазкур сардорони раёсатҳои тандурустии шаҳри Душанбе, ВМКБ, вилоятҳои Суғду Хатлон ва роҳбарони муассисаҳои ҷумҳуриявӣ низ ҳисобот доданд. Пас аз шунидани ҳисоботи масъулин як қатор масъалаҳои муҳими соҳа, аз ҷумла таъминоти кадрӣ, баланд бардоштани донишу малакаи касбии мутахассисон, пешгирии бемориҳои сироятиву ғайрисироятӣ, иҷрои саривақтӣ ва босифати барномаҳои давлатӣ, ворид намудани усулҳои нави ташхису табобат, пешгирии амалҳои номатлуб, пешгирии фавти модару кӯдак, одоби муошират бо беморон, вусъат бахшидани корҳои ободониву созандагӣ, аз ҷумла сохтмон ва таъмиру таҷдиди муассисаҳои тандурустӣ ва дигар масъалаҳо баррасӣ гардид.