Мақомоти амниятии Тоҷикистон дар вилояти Хатлон як гурӯҳи фаромиллиро боздошт намуданд, ки онҳо ба кочоқи маводи мухаддир дар ҳаҷми бисёр зиёд машғул буданд. Дар натиҷаи амалиёт гурӯҳи фаромиллии қочоқбарони маводи мухаддир бо 102 кило маводи нашъаовар, аз ҷумла ҳашиш, афюн, метамфетамин ва мэтадол боздошт шуданд.

Кумитаи давлатии амнияти миллии Ҷумҳурии Тоҷикистон хабар дод, ки амалиёт аз сӯи кормандони Раёсат дар вилояти Хатлон роҳандозӣ шуд ва дар он як гурӯҳи муташаккили ҷиноятии фаромиллӣ, ки шаҳрвандони маҳаллӣ мебошанд, боздошт гардиданд.

Бар асоси маълумоти расмӣ ашхоси боздоштшуда Ҳакимов Фирӯз Баҳодурович (соли таваллуд 1997) ва Ҳусайнзода Абдулло Ҳусайн (соли таваллуд 1988) дар шаҳри Бохтари вилояти Хатлон дар ҷараёни кочоқи маводи мухаддир боздошт шуданд.

Мақомоти амният хабар медиҳанд, ки дар ҷараёни амалиёти махсус макони будубоши муваққатии гумонбарон мавриди кофтуков қарор гирифт ва дар махфигоҳ панҷ борхалтаи маводи мухаддир кашф ва мусодира шуд. Тафтишоти экспертӣ нишон дод, ки маводи мусодиршуда метавонад ҳазорҳо нафарро гирифтори нашаъмандӣ созад.

Мақомоти тафтишотӣ мегӯянд, ки шахси сеюми гурӯҳ Зокиров Аъзам Искандарович (соли таваллуд 1990), сокини шаҳри Бохтар ҳоло дар Иёлоти Муттаҳидаи Амрико буда, дар ҷустуҷӯи байналмилалӣ қарор дорад.

Dialog.tj