Эрон дар посух ба ҳамлаҳои Исроил дар чанд марҳила бо садҳо мушак ва ҳавопаймоҳои бесарнишин ба муҳимтарин маркази атомӣ ва марказҳои низомии Исроил дар шаҳрҳои Тел-Авив ва Ҳайфо ҳамла карданд.

Неруҳои мусаллаҳи Эрон бо эълони амалиёти “Ваъдаи содиқ 3” бо садҳо мушак ва ҳавопаймоҳои бесарнишин ба шаҳрҳои Тел-Авив, Ҳайфо, Муассисаи атомӣ ва марказҳои низомии Исроил ҳамла карданд. Тибқи иттилоъ, мушакҳои Эрон ҳассостарин нуқтаҳои низомӣ дар шаҳри Тел-Авив ва Ҳайфоро мавриди ҳамла қарор доданд.

Амалиёти мушакии “Ваъдаи содиқ 3”, ки бо партоби садҳо мушак ба сӯйи сарзаминҳои ишғолӣ анҷом шуд, пойгоҳҳои низомии режими Исроил ва қароргоҳҳои вазорати ҷанги ин режим дар минтақаи Кирёти Тел-Авивро мавриди ҳамла қарор гирифтанд.

Аксҳои нашршуда аз шаҳри Тел-Авив нишон медиҳанд, ки мушакҳои эронӣ дақиқ ва муваффақона ба ҳадаф мерасанд. Тибқи иттилоъ биноҳои вазорати ҷанг, вазорати амнияти режими Исроил низ мавриди ҳадафи мушакҳои эронӣ қарор гирифтанд.

Сипоҳи посдорони Ҷумҳурии Исломии Эрон чанде қабл дар баёнияи шумораи дувуми худ дар бораи амалиёти “Ваъдаи содиқ 3” гуфт, ки гузоришҳои саҳнавӣ, аксҳои моҳвораӣ ва иттилооти ҷосусӣ нишон медиҳад, ки даҳҳо мушаки балластик ба ҳадафҳои стратегии душман бархӯрд кардааст. Душман бо вуҷуди иддаои раҳгирӣ ва нобудӣ натавонист ба мавҷи ҳамлаҳои мушакии Эрон муқовимат кунад.

“Ин амалиёт бо ҳамоҳангии ҳамаи ниҳодҳо ва Неруҳои мусаллаҳи Ҷумҳурии Исломии Эрон бо иқтидор ва ба таври ҳамлаварона анҷом шуд ва паёми асосии он ин аст, ки амнияти Ҷумҳурии Исломии Эрон хатти сурхи қувваҳои мусаллаҳ мебошад”- зикр кард Сипоҳи посдорони Эрон.

Тибқи иттилои Сипоҳ шаҳри бандарии Ҳайфо низ ба таври муваффақ мавриди зарба қарор гирифт ва сарчашмаҳои исроилӣ хабар доданд, ки дар мавҷи дувуми ҳамлаҳо тақрибан ҳафт нуқтаи Тел-Авив мавриди ҳамлаи мушакии Эрон қарор гирифтанд.

Манобеи исроилӣ гуфтаанд, ки шаби гузашта садҳо мушак аз қаламрави Эрон ба сӯи қаламрави режими Исроил партоб шудаанд. Бар асоси гузориш, баъди ба ҳадаф расидани мушакҳои Эрон дар чандин минтақаи ишғолӣ неруи барқ қатъ шудааст.

Шабакаи 14 –и режими Исроил бо истинод ба як мақоми амниятии исроилӣ хабар дод, ки эрониҳо ба воситаи таҳлили тасвирҳои нашршуда дар шабакаҳои иҷтимоии ибронӣ зарбаҳои дақиқи мушакҳои худро месанҷанд.

Бахши наҷот ва ёрии таъҷилии режими Исроил хабар дод, ки баъзе аз шаҳракнишинон дар дохили биноҳое, ки аз сӯйи мушакҳои эронӣ мавриди ҳамла қарор гирифтаанд, дар мондаанд. Нашряи “Ҳаартес” аз фурӯ рехтани як бинои 32 ошёна дар Тел-Авив дар натиҷаи ба ҳадаф расидани мушакҳои эронӣ хабар дод.

Дар дохили Исроил расонаҳо бо ишора ба ҳамлаи мушакии Эрон навиштанд, ки “мо дар вазъияти ғайриодӣ қарор дорем” ва садои занги хатар дар саросари Исроил ба садо даромадааст.

Телевизиони “Кан” хабар дод, ки шумораи маҷруҳони ҳамлаҳои мушакии Эрон ба 50 нафар расид. Қаблан расонаҳо аз маҷруҳ шудани 17 исроилӣ хабар дода буданд. Ҳамчунин, аз кушта шудани як исроилӣ хабар нашр шудааст.

Dialog.tj