Дар натиҷаи ҳамлаи ҳавоии артиши Исроил ба макони зиндагии оворагони фаластинӣ дар Ғазза 11 нафар, аз ҷумла 8 узви як оила кушта шуданд. Исроил субҳи рӯзи 7-уми май ба макони истиқомати оворагони фаластинӣ ҳамла  кард.

Маҳмуд Басал, сухангӯи Созмони мудофеаи граждании Ғазза тасдиқ намуд, ки ҷасади 11 нафар, аз ҷумла як кӯдакро аз зери харобаҳо берун кашида, ба бемористон интиқол додаанд. Ӯ афзуд, ки беш аз 20 нафар захмӣ шуданд ва аксарияти захмиён кӯдакон мебошанд.

“Дар натиҷаи ҳамлаи ҳавоии неруҳои Исроил ба хонаи оилаи Қудра дар маркази шаҳри Хон Юнус ҳашт узви як оила ба ҳалокат расиданд ва 12 нафари дигар захмӣ шуданд” – афзуд Маҳмуд Басал.

Маҳмуд Басал афзуд, ки “оилаи Қудра бидуни ҳеч гуна ҳушдор ва бо мақсади қатли амдӣ мавриди ҳадаф қарор дода шуд”.

Сухангӯи мудофеаи граждании Ғазза гуфт неруҳои артиши Исроил, ҳамчунин, субҳи рӯзи чоршанбе чандин хонаро дар минтақаҳои Зайтун ва Туффаҳ дар шарқи Ғазза тарконда, хароб кардаанд.

Ҳамла ва бомбаборони шадиди Ғазза аз сӯйи неруҳои артиши Исроил идома дорад. Чанде қабл расонаҳо иттилоъ доданд, ки артиши Исроил лоиҳаи тасарруфи комили Ғаззаро содир кардааст. Мақсади лоиҳаи зикршуда гузаронидани амалиёти низомӣ дар тамоми бахшҳои Ғазза аст. Ин ҳадафро чанде қабл сарвазири Исроил Бенямин Нетаняҳу низ баён кард.

Dialog.tj