Аббос Ироқчӣ, вазири корҳои хориҷии Ҷумҳурии Исломии Эрон гуфт, ки Эрон ҳамчун кишвари имзокунандаи Созишномаи НПТ (Созишномаи паҳн накардани силоҳи атомӣ) “комилан ҳаққи доштани чархаи комили сӯхти атомӣ” –ро дорад. Аббос Ироқчӣ ин масъаларо яке аз нуқтаҳои “калидӣ” дар музокирот бо Амрико унвон кард.

Марко Рубио, вазири корҳои хориҷии Амрико чанде қабл дар як мусоҳиба гуфт, ки Эрон бояд ғанисозии уран ва сохтани мушакҳои дурпарвозро қатъ кунад. Ин ду хостаест, ки мақомоти эронӣ онро хати сурх дар музокирот эълон кардаанд.

Аббос Ироқчӣ дар вокуниш ба изҳороти Марко Рубио дар шабакаи “Х” чунин навишт: “Ман аз муҳокимаи оммавии унсурҳои калидии музокирот ба воситаи расонаҳо ба таври усулӣ худдорӣ мекунам. Аммо он чӣ мехоҳам бигӯям, ин аст, ки такрори дурӯғ воқеиятҳои асосиро тағйир намедиҳад”.

Вазири корҳои хориҷии Эрон афзуд, ки мавқеъгириҳои шадид ва суханҳои таҳрикдиҳанда ҷуз барбод додани шонси муваффақият чизе ба даст намедиҳад.

Дар соатҳои ахир, бо ба таъхир афтидани даври чоруми музокирот  мақомоти Амрико бо шеваҳои мухталиф Эронро таҳдид мекунанд.

Доналд Трамп, президенти Амрико гуфт, ки ҳеч кишвар ҳақ надорад аз Эрон нафт харидорӣ кунад ва Пит Ҳегест, вазири дифои Амрико ҳушдор дод, ки  Эрон аз ҳимояти ҳусиҳо даст бардорад.

Dialog.tj