Дар идомаи ҳамлаҳои ҷинояткоронаи саҳюнистӣ дар Навори Ғазза бар асоси омори расмӣ аз субҳи имрӯз дар минтақаҳои мухталифи ин ҷо 14 ғайринизомӣ кушта шуданд.

Дар рӯзи 41-уми азсаргирии ҷанги ваҳшиёнаи Исроил бар зидди Навори Ғазза ҳамлаҳои ҷинояткоронаи ин режим ба ғайринизомиён дар саросари Ғазза идома дорад ва ҳамзамон паҳлӯҳои нави буҳрони артиши ишғолгар дар ҷараёни ҷанг ошкор шудааст.

Сарчашмаҳои хабарии фаластинӣ иттилоъ доданд, ки субҳи имрӯз ҳавопаймоҳои ҷангии артиши саҳюнистӣ ғарби Хон Юнусро дар ҷануби Навори Ғазза бомбаборон карданд.

Дар ҳамлаи ҳавопаймоҳои артиши Исроил ба хаймаҳои оварогон дар минтақаи Мавасӣ, воқеъ дар ғарби Хон Юнус 12 ғайринизомӣ маҷруҳ шуданд ва чанд нафари дигар ҳам нопадид гаштанд.

Ҳамчунин, дар ҳамлаҳои артиши Исроил ба як бинои истиқоматӣ дар урдугоҳи Бурайҷ дар маркази Навори Ғазза чанд нафар кушта ва захмӣ шуданд.

Манобеи фаластинӣ хабар медиҳанд, ки ҳамлаҳои ҳавопаймоҳои бесарнишин ба ғарби урдугоҳи Ал-Нусайрат дар маркази Навори Ғазза низ идома дорад ва омори шаҳидон ва захмиён то ҳол маълум нест.

Сарчашмаҳои хабарии фаластинӣ ҳамчунин, аз ҳамлаҳои шадиди тӯпхонаҳои артиши Исроил ба минтақаҳои шарқии Ғазза гузориш додаанд. Як чархболи ҳарбии “Апачи” –и Исроил низ ба ғайринизомиён дар шарқи Ғазза оташ кушод.

Сарчашмаҳои маҳаллӣ аз шаҳодати як навраси 17-сола дар бомбаборони минтақаи Хуазаа дар шарқи Хон Юнус хабар доданд. Минтақаи шарқии маҳаллаи Туффаҳ дар шарқи Ғазза низ ҳадафи бомбаборон қарор гирифт.

Дар ҳамлаи ҳавопаймоҳои Исроил ба шимоли Навори Ғазза субҳи имрӯз як кӯдак кушта шуд.

Дар бомбаборони урдугоҳи Ал-Буйраҷ дар маркази Навори Ғазза се ғайринизомӣ кушта ва чанд нафари дигар захмӣ шудаанд.

Як моҳигири фаластинӣ дар баҳри Хон Юнус аз сӯйи қоиқҳои ҷангии артиши Исроил кушта шуд ва чанд тани дигар захмӣ шуданд.

Бар асоси иттилои табибон дар Ғазза аз субҳ то ба имрӯз 14 нафар, аз ҷумла чанд кӯдак кушта шудаанд.

Вазорати тандурустии Ғазза эълон кард, ки дар 24 соати гузашта дар натиҷаи ҳамлаҳои ҳавоии артиши Исроил 39 ғайринизомии фаластинӣ кушта шудаанд.

Dialog.tj