27-уми апрел дар шаҳри Душанбе Ҳунарманди халқии Тоҷикистон Асланшо Раҳматуллоев дар синни 70-солагӣ аз олам даргузашт. Ин хабари нохушро наздикону дӯстони марҳум дар шабакаҳои иҷтимоӣ навиштанд, аммо ҳеч кадоме сабаби маргашро нагуфтанд.

Гуфта мешавад, ки маросими хайрбод бо ҳунарманди маҳбуби кишвар имрӯз, 28-уми апрел соати 08:30 дақиқа дар назди бинои ВАТАН - паҳлӯи кинотеатри “Ватан” доир гашта, ҷаноза соати 10:00 дар масҷиди Имоми Аъзам Абуҳанифа баргузор мешавад.

Тибқи иттилои мавҷуда, Асланшо Раҳматуллоевро дар Оромгоҳи  "Лучоб" ба хок месупоранд.

Бояд ёдовар шуд, ки Асланшо Раҳматуллоев аз ҷумлаи ҳунармандони маҳбуби сарсупурдаи театру синамои тоҷик буд. Ӯ ҳамчун ҳунарманд ва коргардон дар рушди театру кинои тоҷик саҳми назаррас дорад.

Мавсуф пас аз хатми Институти давлатии умумииттифоқии кинематографияи шаҳри Маскав (ВГИК) ба Театри давлатии академӣ-драмавии ба номи А. Лоҳутӣ ба кор омадааст ва пас аз се соли кор бо даъвати Убайдулло Раҷабов ба ҳайси коргардон ба Театри намунавӣ-минётурии «Оина» рафтааст. Ҳамин тавр, зиёда аз 30 сол дар театри мазкур фаъолияти пурсамар дошт.

Ҳамчунин, бояд зикр кард, ки Асланшо Раҳматуллоев дар таҳияи силсилафилми машҳури “Марги бегуноҳ”, ки солҳои ҷанги шаҳрвандиро инъикос мекунад, нақши зиёд дорад. Ӯ ҳамчун коргардон ва ҳунарманд дар сохтани филми мазкур саҳм гузошта, бешак, барои диданитару табиитар баромадани он сабаб шудааст.

Dialog.tj