Ректори Донишгоҳи давлатии тиббии Тоҷикистон ба номи Абуалӣ ибни Сино имрӯз дар нишасти матбуотӣ ба саволи хабарнигорон оиди қазияи донишҷӯёне, ки 1 нафарро латукӯб карда, дастгир шуда буданд, ҷавоб дода гуфт, ки ҳамаи онҳо тибқи муқаррароти Донишгоҳ хориҷ карда шуданд ва фармони ихроҷи онҳо баъди як рӯзи иҷрои ҷинояташон имзо гардид.

Муҳиддин Нуриддин, доктори илмҳои тиб, профессор, ректори Донишгоҳи давлатии тиббии Тоҷикистон ба номи Абуалӣ ибни Сино бо баёни нуктаҳои муҳимми ахлоқӣ, ки хусусан барои донишҷӯйёни духтуршаванда муҳим аст, гуфт, табиб бояд пеш аз ҳама инсондӯст ва инсонпарвар бошад.

“Агар ҷавоне, ки ҳиссиёти инсондӯстӣ надошта бошад, беҳтараш ин риштаро интихоб накунад. Ин ихтисос саропо муҳаббат ба инсонро талаб мекунад. Муҳаббати духтур ба ҷомеа бояд беандоза бошад ва аз дигарон фарқ кунад. Он муҳаббат бояд бо самимияти воқеӣ омехта бошад” – афзуд Муҳиддин Нуриддин.

Ёдовар мешавем, ки 6-уми феврали соли ҷорӣ як гурӯҳ донишҷӯёни Донишгоҳи давлатии тиббии Тоҷикистон Тоҷикистон ба номи Абуалӣ ибни Сино Бобоев М., сокини 29-солаи н. Деваштичро мавриди латукӯб қарор дода, тартиботи ҷамъиятиро дағалона вайрон карда буданд. Дар натиҷаи санҷиш аз ҷониби кормандони милитсияи пойтахт донишҷӯёни курси дуюми донишгоҳи мазкур Юсупов А., Сайитов Ҷ., Шомуродов Х., Бабакулов И., Икромзода А., ва Самадов Ш. дастгир карда шуданд. Дар натиҷа барои дағалона вайрон намудани тартиботи ҷамъиятӣ нисбати ҳамаи иштирокчиёни муноқиша бо моддаи 460 (майдаавбошӣ) КҲМ Ҷумҳурии Тоҷикистон протоколҳои маъмурӣ тартиб дода шуда, нисбати ҳар кадоме ҳабси маъмурӣ ба муҳлати 7 шабонарӯзӣ таъин карда шуд.  

Ҳоло нишасти матбуотӣ дар Донишгоҳи давлатии тиббии Тоҷикистон ба номи Абуалӣ ибни Сино дар ҳоли баргузорӣ аст. 

Dialog.tj