Бенӣ Бегин, писари Менахем Бегин, нахуствазири пешини Исроил ва муассиси ҳизби “Ликуд”, дар остонаи интихоботи Кнессет аз ҷонибдорони ин ҳизб даъват кард, ки ба неруҳои сиёсии хостори барканории Бенямин Нетаняҳу раъй диҳанд. Ӯ нахуствазири феълиро “таҳдид барои ҳамаи мо” номид.

Бино ба гузориши расонаҳои байналмилалӣ, Бенӣ Бегин, ки қаблан намояндаи Кнессет буд, дар паёми видеоӣ аз фаъолияти сиёсии муштараки худ бо Нетаняҳу ёдовар шуд. Ӯ гуфт, ки тақрибан 10–15 сол пеш дар ҳукумати таҳти раҳбарии Нетаняҳу кор кардааст ва он давраро барои шаҳрвандони Исроил мусбат арзёбӣ мекунад.

Ба гуфтаи ӯ, он замон дар дохили ҳукумат баҳсҳои созанда сурат мегирифтанд ва ҳамкорон метавонистанд, сарфи назар аз ихтилофи назар, муносибатҳои дӯстона дошта бошанд.

Бегин афзуд, ки аммо баъдан вазъ тағйир ёфт ва рафтори Нетаняҳу боиси нигаронии ӯ шуд. Ӯ ёдовар шуд, ки панҷ сол пеш аз минбари Кнессет ба Нетаняҳу чунин савол дода буд: “Инсон то чӣ андоза метавонад ба оқиб равад?”

Бенӣ Бегин вазъи кунунии ҳукумати Нетаняҳуро “фоҷиае, ки дар пеши чашми ҳама рух дод” тавсиф карда, гуфт, ки мардум ин равандро бо тааҷҷуб мушоҳида мекунанд.

Интиқод аз сиёсати Нетаняҳу дар остонаи интихобот

Бенӣ Бегин ҳамчунин, аз сиёсати Нетаняҳу дар ду рӯзи пеш аз интихобот интиқод карда, ӯро шахси “изтиробзада, ҳарис ва тарсӯ” номид.

Ӯ Нетаняҳуро ба зарар расондан ба иқтисоди Исроил ва сипас, таҳдид ба партоби бомби атомӣ ба Тел-Авив муттаҳам кард. Бегин дар идомаи суханонаш гуфт: “Чунин нахуствазир барои ҳамаи мо таҳдид аст”.

Ӯ аз ҷонибдорони ҳизби “Ликуд” хост, ки ба ҳукумати Нетаняҳу хотима дода, онро ба курсиҳои оппозитсия фиристанд.

Бегин гуфт: “Рӯзи сешанбе, ба хотири ояндаи фарзандонамон ва хушбахтии набераҳоямон, ба ҳизбҳое раъй диҳед, ки ҳоло метавонанд ҳукуматро тағйир диҳанд”.

Аз ҳамсаф то мунтақидони Нетаняҳу

Бенӣ Бегин аз чеҳраҳои сиёсии Исроил аст, ки дар гузашта вазифаҳои гуногуни парлумонӣ ва вазоратиро, аз ҷумла дар ҳукуматҳои таҳти раҳбарии Нетаняҳу, бар уҳда дошт. Баъдан ӯ ба яке аз мунтақидони сиёсати нахуствазир табдил ёфт.

Соли 2019 Бенӣ Бегин аз ҷудо шуданаш аз ҳизби “Ликуд” хабар дод. Ин тасмимро ӯ ба эътирози аз равиши сиёсии ҳизб ва ихтилофҳо дар робита ба парвандаҳои ҷиноии Нетаняҳу марбут донист.

Соли 2020 ӯ ба ҳизби “Умеди нав”, ки Гидеон Саар раҳбарӣ мекард, пайваст. Ин ҳизб аз сиёсатмадороне ташкил шуда буд, ки бинобар ихтилоф бо Нетаняҳу аз “Ликуд” ҷудо шуда буданд.

Падари ӯ, Менахем Бегин, аз муассисони ҳизби “Ликуд” буд ва аз соли 1977 то соли 1983 вазифаи нахуствазири Исроилро бар уҳда дошт.

Dialog.tj