Бинобар иттилои Маркази мониторинги сейсмикии Институти геология, сохтмони ба заминҷунбӣ тобовар ва сейсмологияи Академияи миллии илмҳои Тоҷикистон, 25 октябр, соати 22:44:27 бо вақти Тоҷикистон  дар қаламрави Ҷумҳурии Исломии Афғонистон заминҷунбӣ ба қайд гирифта шуд.

Манбаъ навиштааст, ки заминҷунбӣ дар ҳудуди Ҷумҳурии Тоҷикистон, Ҷумҳурии Исломии Афғонистон, Ҷумҳурии Исломии Покистон ва Ҷумҳурии Узбекистон эҳсос гардид.

Гуфта мешавад, ки маркази заминҷунбӣ дар қаламрави Афғонистон, дар координатаҳои ҷуғрофии 36,44 дараҷа арзи шимолӣ ва 70,99 дараҷа тӯли шарқӣ муайян карда шудааст. Мутахассисон магнитудаи заминҷунбиро 5,2 ва чуқурии манбаи онро тақрибан 110 километр арзёбӣ намудаанд.

Афзуда мешавад, ки маркази заминҷунбӣ дар масофаи тақрибан 305 километр ҷанубу шарқ аз шаҳри Душанбе, 128 километр аз шаҳри Хоруғи Вилояти Мухтори Кӯҳистони Бадахшон ва 64 километр аз маркази ноҳияи Ишкошим ҷойгир шудааст.

“Мувофиқи натиҷаҳои арзёбии макросейсмикӣ, шиддатнокии ларзиши замин дар минтақаи маркази заминҷунбӣ аз 5 то 5,5 балл ва дар шаҳри Душанбе аз 3 то 3,2 балл аз рӯйи ҷадвали дувоздаҳбаллаи MSK-64 муайян гардидааст”, - омадааст дар иттилоия.

Dialog.tj