Расонаи давлатии Чин мегӯяд, бунёди роҳи Вахон то марзи Чин ба маънои боз шудани гузаргоҳи марзӣ миёни ду кишвар нест.

Ин расонаи чинӣ амалан боз шудани гузаргози марзии Чину Афғонистонро рад кардааст. Ин расона менависад, ки бунёди роҳ аз боз шудани гузаргоҳи марзӣ фарқ мекунад. Ба иттилои ин расона, то замоне ки расман гузаргоҳи марзӣ боз нашавад, бунёди он неметавонад ба маънои барқарор шудани робитаҳои транзитии Чин бо Афғонистон бошад.

Қаблан Ҳамидуллоҳ Фитрат, муовини сухангӯи гурӯҳи террористии Толибон гуфта буд, ки бунёди роҳи 121-километрӣ аз Броғил то нуқтаи марзӣ бо Чин ба анҷом расидааст.

Ӯ иттилоъ дод, ки ин роҳ дар ду марҳила ва бо харҷи 365 миллион афғонӣ бунёд шудааст. Вазорати эҳё ва рушди деҳоти гурӯҳи террористии Толибон низ анҷоми роҳи Броғил то марзи Чинро тасдиқ кардааст.

Пас аз нашри ин хабар, баъзе расонаҳо анҷом додани бунёди роҳро як қадами муҳим барои пайвасти заминии Афғонистон ба Чин арзёбӣ карданд.

Расонаи чинӣ мегӯяд, ки бунёди роҳ фақат як қисми масъала аст ва то ҳол далели боз шудани гузаргоҳи расмии марзӣ ва оғози ҳаракати тиҷоратӣ миёни ду кишвар вуҷуд надорад.

Долони Вахон як минтақаи танги кӯҳистонӣ дар шимолу шарқи Афғонистон аст, ки ин кишварро ба Чин мепайвандад. Фаъол шудани гузаргоҳ дар ин минтақа метавонад барои тиҷорат ва роҳҳои транзитии Афғонистон аҳамият дошта бошад.

То кунун мақомоти Чин ва Толибон дар бораи оғози расмии транзити марзӣ тавассути ин масир ҷузъиёти бештаре нашр накардаанд.

Dialog.tj