Антониу Гутерриш, дабири кулли Созмони Милали Муттаҳид, барои гуфтугӯ дар бораи нақши миёнҷигаронаи Покистон дар муноқишаи миёни Амрико ва Эрон ба Исломобод рафт.

Хабаргузории давлатии Покистон (APP) рӯзи душанбе, 5-уми октябр, гузориш додааст, ки Гутерриш шоми якшанбе Ню-Йоркро ба мақсади Исломобод тарк кардааст.

Ӯ дар сафари чаҳоррӯзаи худ дар бораи нақши Покистон дар миёнҷигарӣ миёни Амрико ва Эрон ва ҳамчунин, нақши “созанда”-и ин кишвар дар ҳимоят аз музокироти миёни ду тараф гуфтугӯ хоҳад кард.

Гутерриш дар ин сафар бо Муҳаммад Шаҳбоз Шариф, нахуствазири Покистон, Муҳаммад Исҳоқ Дор, муовини нахуствазир ва вазири хориҷа ва шуморе аз мақомҳои болоии ин кишвар дидор хоҳад кард.

Ӯ, ҳамчунин, бо Осиф Алӣ Зардорӣ, раиси ҷумҳури Покистон, мулоқот мекунад.

Стефин Дюҷаррик, сухангӯйи Дабири кулли Созмони Милал, гуфтааст, ки Покистон дар солҳои гузашта аз тариқи дипломатия ва миёнҷигарӣ барои наздик кардани тарафҳои даргир ба мизи гуфтугӯ талош кардааст.

Дабири кулли Созмони Милал пеш аз ин низ аз талошҳои дипломатии Покистон дар муноқишаи Ховари Миёна ва нақши ин кишвар дар дастёбӣ ба тафоҳумномае, ки заминаи барқарории оташбасро фароҳам кард, қадрдонӣ карда буд.

Dialog.tj