22 Ноябр 2026,
якшанбе, 05:01, Душанбе
01.10.2026 15:35

Намояндаи Ҳиндустон: Забони англисӣ забони сеюми СҲШ шуд

Забони англисӣ дар баробари забони русиву чинӣ ба ҳайси забони расмии сеюми Созмони ҳамкории Шанхай қабул шудааст.

Дар ин хусус, Алок Димрӣ, намояндаи Ҳиндустон дар нишасти ҳамоҳангсозони миллии Созмони ҳамкории Шанхай дар Исломобод хабар дод. Тибқи гуфтаи ӯ, ин тағйир ба кишварҳои узв имкон дод, ки дар муоширати расмӣ аз забони англисӣ низ истифода намоянд.

Алок Димрӣ, ҳамоҳангсози миллии Ҳиндустон дар Созмони ҳамкории Шанхай ва мақоми баландпояи Вазорати корҳои хориҷаи ин кишвар дар мулоқот бо телевизиони давлатии Покистон - “РТV” гуфт, ки то ба имрӯз забонҳои русиву чинӣ дар кори расмии созмон нақши асосӣ доштанд.

Ӯ таъкид намуд, ки забони англисӣ низ ба забонҳои расмии Созмони ҳамкории Шанхай ҳамроҳ шудааст. Ин қарор дар нишасти Созмони ҳамкории Шанхай дар шаҳри Бишкек моҳи сентябр қабул шудааст.

Алок Димрӣ гуфт, тағйироти мазкур барои фаъолияти созмон аҳамияти муҳим дорад, зеро кишварҳои узви Созмони ҳамкории Шанхай аз минтақаҳои мухталифи осиёӣ ва авруосиёӣ иборат аст.

“То имрӯз кишварҳои узви Созмони ҳамкории Шанхай ба забонҳои русиву чинӣ гуфтугӯ мекарданд. Ҳоло ин гуфтугӯҳо ба забони англисӣ низ оғоз мешаванд”- зикр намуд ӯ.

Тибқи гуфтаи ӯ, кишварҳои узв барои таҳкими ҳамкорӣ дар соҳаҳои рушди иқтисодӣ, некӯаҳволӣ ва шукуфоии муштарак рӯзномаи муштарак таҳия кардаанд.

“Равобити минтақавӣ, транзит ва тиҷорат масъалаҳои муҳимме ҳастанд, ки мо баррасӣ кардем ва дар ин самт пеш меравем”, - гуфтааст намояндаи Ҳиндустон.

Ин масъала барои Ҳиндустон муҳим аст, зеро дастрасии мустақими ин кишвар ба Афғонистон ва Осиёи Марказӣ тавассути қаламрави Покистон маҳдуд мебошад. Ҳиндустон дар солҳои охир барои рушди масирҳои алтернативии тиҷоратӣ ва нақлиётӣ, аз ҷумла тавассути Эрон, талош кардааст.

Муколамаи тамаддунҳо дар Деҳлии Нав

Алок Димрӣ, инчунин, ба ташаббуси баргузории Форуми муколамаи тамаддунҳо дар доираи СҲШ ишора кард.

Ба гуфтаи ӯ, сарвазири Ҳиндустон Нарендра Модӣ қаблан пешниҳод карда буд, ки кишварҳои узви СҲШ масъалаҳои марбут ба тамаддун ва фарҳангро дар шакли муколама баррасӣ кунанд.

Кишварҳои узв дар нишасти Бишкек мувофиқа кардаанд, ки форуми муколамаи тамаддунҳо рӯзи 20-уми ноябр дар Деҳлии Нав баргузор шавад.

Алок Димрӣ гуфт, ки СҲШ имрӯз кишварҳои гуногуни Авруосиё ва Осиёро дар як платформа муттаҳид мекунад ва чунин ҳамкориҳо метавонанд ба рушди робитаҳои минтақавӣ мусоидат кунанд.

Покистон раёсати СҲШ-ро ба уҳда дорад

Нишасти ҳамоҳангсозони миллии СҲШ дар Исломобод дар давраи раёсати Покистон баргузор мешавад.

Исҳоқ Дор, муовини сарвазир ва вазири корҳои хориҷаи Покистон гуфтааст, ки кишвараш барои раёсати кушода ва фарогири созмон бар асоси принсипҳои “Рӯҳи Шанхай” талош мекунад.

Мавзуи раёсати Покистон дар СҲШ “Табдили дидгоҳ ба амал: пайвастагии минтақавӣ, навоварӣ ва шукуфоии муштарак” интихоб шудааст.

Иштироки ҳайати Ҳиндустон дар нишасти Исломобод аввалин сафари ҳайати ин кишвар ба Покистон пас аз амалиёти “Sindoor” мебошад.

Қаблан, моҳи октябри соли 2024, вазири корҳои хориҷии Ҳиндустон Субраманям Ҷайшанкар барои иштирок дар нишасти Шурои сарони ҳукуматҳои СҲШ ба Исломобод рафта буд.

СҲШ аз Русия, Чин, Ҳиндустон, Эрон, Покистон, Қазоқистон, Қирғизистон, Тоҷикистон, Ӯзбекистон ва Беларус иборат аст.

Dialog.tj

Хатти хабарҳо

21.11.2026 14:33

Баҳси ҷадид дар парлумони Озарбойҷон: қатъи маблағгузории давлатии мактабҳои русӣ

Намояндаи Ҳизби ҳокими Озарбойҷон пешниҳод кардааст, ки масъалаи маблағгузории давлатии таҳсил ба забони русӣ дар мактабҳои кишвар аз нав баррасӣ шавад. Ин пешниҳод дар ҳоле матраҳ шудааст, ки ҳоло дар бахшҳои русизабони мактабҳои Озарбойҷон 157 ҳазор хонанда таҳсил мекунанд.
21.11.2026 14:10

Гандӣ: “Бо Исроил равобити стратегӣ дорем”

Раҳул Гандӣ, раҳбари мухолифони Ҳиндустон ва рақиби Нарендра Модӣ барои мақоми нахуствазирӣ, зимни сафар ба ИМА аз равобити кишвараш бо Исроил ҳимоят карда, гуфт, ки аз миёнаравии Покистон дар музокироти Амрико ва Эрон “шок” шудааст.
21.11.2026 13:46

Дар 9 моҳи соли 2026 беш аз 36 ҳазор шаҳрванди Қазоқистон ба Тоҷикистон сафар кардаанд

Дар 9 моҳи соли 2026 ба Тоҷикистон 36 ҳазору 400 шаҳрванди Қазоқистон сафар кардаанд. Ин кишвар аз рӯи шумори шаҳрвандони воришуда ба Тоҷикистон дар миёни кишварҳои узви Иттиҳоди Давлатҳои Мустақил мақоми чорумро касб кардааст.
21.11.2026 11:26

Эмомалӣ Раҳмон ва Владимир Путин вазъи амниятӣ дар марзи Тоҷикистону Афғонистонро баррасӣ карданд

Эмомалӣ Раҳмон, раиси ҷумҳури Тоҷикистон дар дидор бо Владимир Путин, раиси ҷумҳури Русия вазъи амниятӣ дар марзи Тоҷикистону Афғонистон, мубориза бо қочоқи маводи мухаддир ва таҳдидҳои минтақавиро баррасӣ кардааст.
21.11.2026 11:17

Қазоқистон дар миёни се шарики бузурги тиҷоратии Тоҷикистон қарор гирифт

Гардиши савдои хориҷии Ҷумҳурии Тоҷикистон бо Қазоқистон дар моҳҳои январ - октябри соли 2026 нисбат ба ҳамин давраи соли гузашта 30,3 фоиз афзоиш ёфта, ба тақрибан 1 миллиарду 280 миллион доллар расидааст. Бо ин нишондиҳанда Қазоқистон дар миёни се шарики асосии тиҷорати Тоҷикистон қарор дорад.
20.11.2026 17:43

Тоҷикистон дар шохиси ҷаҳонии рушди сайёҳӣ берун монд

Ҷумҳурии Тоҷикистон имсол дар шохиси нави ҷаҳонии Рушди сайёҳӣ ҷой нагирифт. Дар ин гузориш сабаби ба рӯйхат ворид нагардидани Тоҷикистон шарҳ дода нашудаст. Ин дар ҳолест, ки омори расмӣ мегӯяд, шумори сайёҳон афзоиш ёфтааст.