22 Ноябр 2026,
якшанбе, 21:11, Душанбе
29.09.2026 12:33

Ироқчӣ: “Шартҳои Эрон барои бозгушоии тангаи Ҳурмуз ба Амрико пешниҳод шуд”

Сайид Аббос Ироқчӣ, вазири корҳои хориҷии Эрон мегӯяд, шартҳои Теҳрон барои бозгушоии тангаи Ҳурмуз, ки ба гуфтаи ӯ аз ҷониби раҳбари олии Эрон таъкид шудаанд, ба ҷониби Амрико расонида шудаанд.

Ироқчӣ рӯзи душанбе дар суҳбат бо хабарнигорони эронӣ дар “Ню-Йорк” гуфт, Эрон барои боз кардани тангаи Ҳурмуз иҷрои як қатор шартҳоро зарур медонад. Ба гуфтаи ӯ, ин шартҳо ҳам ба Амрико ва ҳам ба дигар кишварҳо ва ҷомеаи байналмилалӣ расонида шудаанд.

Вазири корҳои хориҷии Эрон гуфт, Теҳрон чунин мавқеъ дорад, ки агар Вашингтон воқеан дар пайи созиш ё роҳи ҳалли осоишта бошад, Эрон роҳи расидан ба чунин ҳалли масъалаҳоро пешниҳод кардааст.

Ба гуфтаи Ироқчӣ, пешниҳоди Эрон, ки бо номи “Тарҳи ҳафтмоддаӣ” маъруф шудааст, тавассути Қатар ба ҷониби Амрико расонида шудааст. Ӯ гуфт, Эрон ҳанӯз мунтазири посухи расмии Вашингтон тавассути миёнаравҳо мебошад.

Ироқчӣ афзуд, ки яке аз миёнҷиҳо рӯзи душанбе бо ҳайати Эрон мулоқоти дигар анҷом додааст. Дар ин мулоқот дар бораи роҳҳои иҷрои шартҳои Эрон ва пайдо кардани роҳ барои амалӣ шудани онҳо гуфтугӯ шудааст. Ба гуфтаи ӯ, қарор аст миёнҷиҳо ин пешниҳодҳоро дубора ба ҷониби Амрико расонанд ва посухи ниҳоии Вашингтонро ба Теҳрон интиқол диҳанд.

Ӯ гуфт, интизор меравад посухи Амрико то рӯзи дигар расонида шавад ва агар посухе дарёфт шавад, қарор дар бораи он дар Теҳрон гирифта хоҳад шуд.

Ироқчӣ ҳамчунин, гузоришҳо дар бораи тағйир ё нарм шудани мавқеи Эронро рад кард. Ӯ гуфт, “ҳеч тағйире дар мавқеи Эрон сурат нагирифтааст” ва шартҳои Теҳрон барои боз кардани тангаи Ҳурмуз ҳамоно мушаххасанд.

Ба гуфтаи вазири корҳои хориҷии Эрон, дар ҳоли ҳозир мавзуи асосии баҳс тангаи Ҳурмуз аст ва боз шудани он ба иҷрои шартҳое вобаста мебошад, ки ба ҷониби муқобил эълон шудаанд.

Ироқчӣ аз расонаҳо хост ба “гумонзаниҳо ва фазосозиҳои қасдона” дар бораи тағйири мавқеи Эрон таваҷҷуҳ накунанд.

Dialog.tj

Хатти хабарҳо

21.11.2026 14:33

Баҳси ҷадид дар парлумони Озарбойҷон: қатъи маблағгузории давлатии мактабҳои русӣ

Намояндаи Ҳизби ҳокими Озарбойҷон пешниҳод кардааст, ки масъалаи маблағгузории давлатии таҳсил ба забони русӣ дар мактабҳои кишвар аз нав баррасӣ шавад. Ин пешниҳод дар ҳоле матраҳ шудааст, ки ҳоло дар бахшҳои русизабони мактабҳои Озарбойҷон 157 ҳазор хонанда таҳсил мекунанд.
21.11.2026 14:10

Гандӣ: “Бо Исроил равобити стратегӣ дорем”

Раҳул Гандӣ, раҳбари мухолифони Ҳиндустон ва рақиби Нарендра Модӣ барои мақоми нахуствазирӣ, зимни сафар ба ИМА аз равобити кишвараш бо Исроил ҳимоят карда, гуфт, ки аз миёнаравии Покистон дар музокироти Амрико ва Эрон “шок” шудааст.
21.11.2026 13:46

Дар 9 моҳи соли 2026 беш аз 36 ҳазор шаҳрванди Қазоқистон ба Тоҷикистон сафар кардаанд

Дар 9 моҳи соли 2026 ба Тоҷикистон 36 ҳазору 400 шаҳрванди Қазоқистон сафар кардаанд. Ин кишвар аз рӯи шумори шаҳрвандони воришуда ба Тоҷикистон дар миёни кишварҳои узви Иттиҳоди Давлатҳои Мустақил мақоми чорумро касб кардааст.
21.11.2026 11:26

Эмомалӣ Раҳмон ва Владимир Путин вазъи амниятӣ дар марзи Тоҷикистону Афғонистонро баррасӣ карданд

Эмомалӣ Раҳмон, раиси ҷумҳури Тоҷикистон дар дидор бо Владимир Путин, раиси ҷумҳури Русия вазъи амниятӣ дар марзи Тоҷикистону Афғонистон, мубориза бо қочоқи маводи мухаддир ва таҳдидҳои минтақавиро баррасӣ кардааст.
21.11.2026 11:17

Қазоқистон дар миёни се шарики бузурги тиҷоратии Тоҷикистон қарор гирифт

Гардиши савдои хориҷии Ҷумҳурии Тоҷикистон бо Қазоқистон дар моҳҳои январ - октябри соли 2026 нисбат ба ҳамин давраи соли гузашта 30,3 фоиз афзоиш ёфта, ба тақрибан 1 миллиарду 280 миллион доллар расидааст. Бо ин нишондиҳанда Қазоқистон дар миёни се шарики асосии тиҷорати Тоҷикистон қарор дорад.
20.11.2026 17:43

Тоҷикистон дар шохиси ҷаҳонии рушди сайёҳӣ берун монд

Ҷумҳурии Тоҷикистон имсол дар шохиси нави ҷаҳонии Рушди сайёҳӣ ҷой нагирифт. Дар ин гузориш сабаби ба рӯйхат ворид нагардидани Тоҷикистон шарҳ дода нашудаст. Ин дар ҳолест, ки омори расмӣ мегӯяд, шумори сайёҳон афзоиш ёфтааст.