Си Ҷинпин, раиси ҷумҳури Чин дар оғози сафари расмии худ ба Иёлоти Муттаҳида гуфт, ки Пекин ва Вашингтон бояд ба ҷойи рақобат ба шарикӣ ва ҳамкорӣ тамаркуз кунанд.

Ба гузориши хабаргузории “Синхуа”, Си Ҷинпин рӯзи панҷшанбе пас аз ворид шудан ба хоки ИМА дар як паём навишт: “Чин ва Иёлоти Муттаҳида бояд шарики якдигар бошанд, на рақиб”.

Ӯ таъкид кард, ки Чин ва ИМА ҳар ду кишварҳои бузурганд ва мардумони ду кишвар низ миллатҳои бузург ба шумор мераванд.

Раиси ҷумҳури Чин бо ишора ба собиқаи равобити дӯстонаи мардумони ду кишвар ва ба ҳам пайвастагии манофеи онҳо гуфт, ки ду миллат метавонанд ҳамзамон пеш раванд, якдигарро такмил диҳанд ва барои ҷаҳон судманд бошанд.

Истиқболи Трамп аз Си Ҷинпин

Хабаргузории “Синхуа” пештар хабар дода буд, ки Си Ҷинпин ҳамроҳ бо ҳамсараш Пэн Лиюан, бонуи аввали Чин, ба хоки Иёлоти Муттаҳида ворид шудааст.

Доналд Трамп, раиси ҷумҳури ИМА ва ҳамсараш Мелания Трамп дар майдони ҳавоӣ аз Си Ҷинпин ва ҳамсараш истиқбол карданд. Ин истиқбол дар назди ҳавопаймои ҳомили раиси ҷумҳури Чин баргузор шуд.

Dialog.tj