Раиси вилояти Суғд Раҷаб Аҳмадзода бо раиси Иттиҳодияи содиркунандагони вилояти Хуросони Ҷумҳурии Исломии Эрон, муовини Палатаи муштараки бозоргонии Тоҷикистону Эрон Шердил Қозим мулоқот намуд. 

Тавре ки хадамоти матбуоти раиси вилояти Суғд хабар медиҳад, Раҷаб Аҳмадзода доир ба имконияту иқтидори иқтисодиву истеҳсолии вилоят маълумот дода, иброз доштааст, ки дар шаҳру ноҳияҳои Суғд садҳо иншооти муҳими истеҳсоливу иҷтимоӣ бунёд гардида, дар ин раванд истифодаи технологияҳои муосир ва ҷорӣ намудани хатҳои нави истеҳсолӣ ба таври васеъ ба роҳ монда шудааст.

Манбаъ навиштааст, ки дар мулоқот масъалаи ҳамкорӣ дар самти навсозии хатҳои ташноб, таҷдиду навсозии мавзеъҳои партовоб, насби технологияҳои муосир барои коркарди партовоб ва истеҳсоли нуриҳои органикӣ аз партовоб мавриди баррасӣ қарор гирифт.

Гуфта мешавад, ки дар марҳилаи аввал татбиқи чунин лоиҳаҳо дар шаҳри Хуҷанд ва минтақаи атрофи он, аз ҷумла дар шаҳрҳои Гулистон ва Бӯстон ва ноҳияи Бобоҷон Ғафуров дар назар дошта шудааст.

"Раиси вилояти Суғд таъкид намуд, ки ҷорӣ намудани технологияҳои муосир дар самти коркарди партовоб ва истифодаи оқилонаи маҳсулоти коркардшуда, аз ҷумла истеҳсоли нуриҳои органикӣ барои соҳаи кишоварзӣ аҳамияти муҳим дорад", - зикр мегардад дар иттилоия.

Dialog.TJ