Бинобар иттилои АМИТ «Ховар», 4-уми сентябр дар шаҳри Москваи Федератсияи Русия дар доираи Намоишгоҳи 39-уми байналмилалии китоби Москва Озмуни байналмилалии «Санъати китоб» баргузор шуд, ки дар он «Шоҳнома»-и Абулқосим Фирдавсӣ сазовори Шоҳҷоиза гардид.

Манбаъ навиштааст, ки ба озмуни мазкур Вазорати фарҳанги Ҷумҳурии Тоҷикистон беҳтарин китобҳои муассисаҳои нашриявии кишварро дар 9 номинатсия пешниҳод намуд. Китобҳои пешниҳодшуда бо назардошти арзиши баланди адабӣ, илмӣ, таърихӣ ва фарҳангӣ, инчунин сатҳи таҳия, ороиш ва иҷрои полиграфӣ интихоб гардида буданд.

Гуфта мешавад, ки дар баробари Шоҳҷоиза якчанд китобҳои дигари Тоҷикистон низ дар озмун сазовори ҷойҳои ифтихорӣ гардиданд. Китоби «Олами гулдӯзии тоҷик» ҷойи якумро соҳиб шуд. Китобҳои «Дар ҳавои Мавлоно»-и Раҳмоналӣ Мирализода, «Физикаи олам, фалсафаи ҳастӣ»-и Фарҳод Раҳимӣ ва маҷмуаи «Сандуқи афсонаҳо», ки дар муассисаи нашриявии «Адабиёти бачагона» ба табъ расид, ҷойи дуюмро гирифтанд. Ҳамчунин, китобҳои «Достони Душанбе»-и Давлат Сафар, «Мулки меҳру мулки шеъру мулки сеҳр»-и Низом Қосим ва «Намунаи адабиёти тоҷик» сазовори ҷойҳои сеюм гардиданд.

Дар ин росто, субҳи имрӯз, 5-уми сентябр маркази матбуоти Вазорати фарҳанги Ҷумҳурии Тоҷикистон хабар дод, ки дар Фурудгоҳи байналмилалии шаҳри Душанбе аҳли фарҳанг ва намояндагони соҳаи фарҳанги кишвар Шоҳҷоизаи «Шоҳнома»-ро бо эҳтиром ва шукуҳи хоса истиқбол гирифтанд.

Dialog.tj