Ҷабҳаи озодии Афғонистон мегӯяд, ки дар даргирӣ бо ҷангҷӯёни гурӯҳи террористии Толибон дар ноҳияи (вулусволии) Зебоки вилояти Бадахшон, 5 ҷангҷӯи Толибон кушта ва 11 ҷангҷӯи дигари ин гурӯҳ захмӣ шудаанд.

Ин ҷабҳа шоми рӯзи чоршанбе, 5-уми август бо нашри хабарномае гуфтааст, ки даргирӣ баъд аз нисфирӯзӣ бо ҳамлаи Толибон ба сангарҳои неруҳои Ҷабҳаи озодӣ оғоз шуда, тақрибан чаҳор соат идома доштааст.

Ҷабҳаи озодӣ афзудааст, ки неруҳои онҳо ҳамлаи Толибон ба мавқеъҳои худ дар ноҳияи Зебоки вилояти Бадахшонро рафъ карда, дар ҷараёни даргирӣ ба ҷангҷӯёни Толибон талафот ворид кардаанд.

Бар асоси хабарнома, неруҳои Ҷабҳаи озодӣ пас аз рафъи ҳамлаи Толибон, бо истифода аз силоҳҳои сабук ва вазнин ба ҷангҷӯёни ин гурӯҳ талафот ворид кардаанд.

Ҷабҳаи озодии Афғонистон гуфтааст, ки Толибон ақибнишинӣ кардаанд ва дар ин даргирӣ ба нерӯҳои онҳо осебе нарасидааст.

Dialog.tj