Расонаҳои амрикоӣ гузориш додаанд, ки давлати Доналд Трамп дар ҳоли баррасии тарҳи анҷоми амалиёти низомӣ алайҳи гурӯҳи “Ҷамоат Нусрат ал-Ислом вал-Муслимин” (JNIM) дар кишвари африқоии Молӣ аст.

“Вашингтон Пост”, шаби чоршанбе, гузориш додааст, ки миёни мақомоти аршади давлати Амрико дар бораи иҷрои ин тарҳ ихтилофи назар вуҷуд дорад. Бо ин ҳол, Себастян Горка, мудири аршади мубориза бо терроризми Шурои амнияти миллии Кохи Сафед, аз ҷумлаи мақомҳое аст, ки аз амалиёти низомӣ алайҳи ин гурӯҳи вобаста ба “Ал-Қоида” ҳимоят мекунад.

Бар асоси гузориш, як мақоми давлати Амрико, ки нахостааст номаш гирифта шавад, эҳтимоли судури иҷозаи ҳамла ба Молиро тасдиқ ё рад накардааст. Ӯ гуфтааст, ки Иёлоти Муттаҳида аз давлатҳои шимол ва ғарби Африқо хостааст барои ҳимоят аз талошҳои худ дар мубориза бо гурӯҳҳои террористӣ, таҷҳизот ва хадамоти амрикоиро харанд.

Ин мақом терроризм дар минтақаи Соҳили Африқоро “мушкили чандмиллатӣ” хонда, афзудааст, ки Вашингтон аз шарикони минтақаӣ ва ҳампаймонҳои НАТО мехоҳад аз Иттиҳоди кишварҳои Соҳил дар ҷанги зидди гурӯҳи “Ҷамоат Нусрат ал-Ислом вал-Муслимин” ва гурӯҳи “Давлати исломӣ” (ДОИШ) ҳимоят кунанд.

Ба гуфтаи ӯ, Амрико умедвор аст, ки Иттиҳоди кишварҳои Соҳил бар терроризм пирӯз хоҳад шуд, аммо Русияро масъули бад шудани вазъи амниятӣ дар Молӣ донистааст. Ин мақом иддао кардааст, ки Русия нишон додааст, ки шарики амниятии нокоромаде барои Молӣ мебошад.

Вай ҳамчунин, изҳор доштааст, ки Амрико умедвор аст дигар кишварҳои африқоӣ низ ба натиҷаҳои заифи Русия дар мубориза бо терроризм таваҷҷуҳ кунанд.

Гуфта мешавад, Вазорати корҳои хориҷии Амрико соли 2018 гурӯҳи “Ҷамоат Нусрат ал-Ислом вал-Муслимин”-ро ба ҳайси як созмони террористии хориҷӣ феҳрист кардааст.

Dialog.tj