Гурӯҳи террористии Толибон эълом карданд, ки дар пайи селҳои вайронгар дар шаҳри Парун, маркази вилояти Нуристон, 20 тан ҷон бохтанд ва беш аз 80 тани дигар захмӣ шуданд.

Хабаргузории “Бохтар”, таҳти назорати Толибон, рӯзи душанбе, гузориш додааст, ки дар ин рӯйдод беш аз 100 тан низ нопадид шудаанд ва амалиёти ҷустуҷӯ ҳамчунон идома дорад.

Юсуф Ҳамод, сухангӯи Идораи омодагии мубориза бо ҳаводиси Толибон, гуфтааст, ки тимҳои ҷустуҷӯ ва наҷотдиҳӣ барои расидагӣ ба вазъияти осебдидагон ва ёфтани афроди нопадидшуда ба маҳал фиристода шудаанд.

Ӯ афзудааст, ки бо идомаи амалиёти имдодрасонӣ, эҳтимоли тағйири омори талафот ва осебдидагон вуҷуд дорад.

Толибон пештар низ эълом карда буданд, ки дар пайи боришоти шадид ва ҷорӣ шудани селобҳо дар ноҳияи Мандули вилояти Нуристон, хисороти қобили таваҷҷуҳи молӣ ба бошандагони ин минтақа ворид шудааст.

Dialog.tj