Тавре ки маркази матбуоти Федератсияи футболи Тоҷикистон хабар медиҳад, дар қароргоҳи Созмони Милали Муттаҳид дар шаҳри Ню-Йорк бо ибтикори Намояндагии доимии Ҷумҳурии Тоҷикистон дар назди СММ ва дар ҳамкорӣ бо Дафтари СММ оид ба масъалаҳои ҷавонон чорабинии сатҳи баланд таҳти унвони «Як ҷаҳон, як бозӣ, як ҳадаф: Футбол ҳамчун омили пешбурди солимии равонӣ ва некӯаҳволии ҷавонон» баргузор гардид.

Гуфта мешавад, ки дар чорабинӣ ноиби якуми Президенти Федератсияи футболи Тоҷикистон Хуршед Мирзо, президенти FIFA Ҷованни Инфантино ва ёвари Дабири кулли СММ оид ба масъалаҳои ҷавонон Фелипе Пауллиер иштирок намуда, нақши футбол ва технологияҳои муосирро дар таҳкими солимии равонӣ, рушди ҷавонон ва густариши ҳамгироии иҷтимоӣ муҳим арзёбӣ карданд.

“Зимни суханронӣ таъкид гардид, ки дар шароити рушди босуръати технологияҳои рақамӣ, футбол метавонад бо истифода аз платформаҳои рақамӣ, воситаҳои муосири иртиботӣ ва ҳалли инноватсионӣ барои ҷалби бештари ҷавонон ба тарзи ҳаёти солим, тарғиби арзишҳои инсонӣ ва рушди фарҳангӣ мусоидат намояд”, - навиштааст манбаъ.

Дар доираи чорабинӣ видеои маъракаи «Тӯбро ба дигар нафар парто», ки дар ҳамкорӣ бо Федератсияи футболи Тоҷикистон ва ЮНИСЕФ Тоҷикистон таҳия гардидааст, намоиш дода шуда, истифодаи васеи воситаҳои рақамии иттилоотӣ ва шабакаҳои иҷтимоӣ барои баланд бардоштани сатҳи огоҳии ҷавонон оид ба масъалаҳои солимии равонӣ ва некӯаҳволӣ намунаи муваффақи ҳамгироии варзиш ва технология арзёбӣ гардид.

Dialog.tj