Фридрих Мертс, нахуствазири Олмон, дар вокуниш ба интиқодҳои Доналд Трамп, раиси ҷумҳури Иёлоти Муттаҳидаи Амрико, аз сиёсати дифоии аъзои НАТО, аз афзоиши буҷаи дифоии кишвараш ҳимоят карда ва гуфтааст, ки Олмон тайи чаҳор соли оянда хароҷоти низомии худро ду баробар хоҳад кард.

Мертс рӯзи ҷумъа, 3-уми июл, дар остонаи нишасти раҳбарони НАТО дар Анқара гуфтааст, ки Олмон бузургтарин барномаи тақвияти тавони дифоии худро иҷро мекунад ва дар ин замина “ҳеч далеле барои ақибнишинӣ дар баробари ҳеч кишваре” надорад.

Ин изҳорот пас аз он матраҳ шуд, ки Доналд Трамп, раиси ҷумҳури Амрико дар шабакаи иҷтимоии “Truth Social” муддаӣ шуд, ки Олмон байни солҳои 2014 то 2025 дар муқоиса бо Амрико ва дигар аъзои НАТО хароҷоти дифоии “бисёр камтаре” дошта ва ин вазъиятро “бемаъно” ва “якҷониба” тавсиф кард.

Мертс ҳамчунин, эълом кардааст, ки Олмон то соли 2029, шаш сол зудтар аз муҳлати таъйиншуда, ҳадафи ихтисоси 3,5 дарсади маҷмуи маҳсулоти дохилӣ (ММД)-ро ба хароҷоти дифоӣ амалӣ хоҳад кард.

Қарор аст раҳбарони НАТО ҳафтаи оянда дар Анқара дар бораи масъалаҳои амниятӣ, ҷанги Украина ва афзоиши хароҷоти дифоии кишварҳои узв гуфтугӯ кунанд.

Ихтилофҳо миёни Вашингтон ва муттаҳидони аврупоии НАТО дар моҳҳои охир бар сари саҳми хароҷоти дифоӣ, ҷанги Украина ва сиёсатҳои Амрико дар қиболи Эрон ва Гренландия афзоиш ёфтааст.

Dialog.tj