Ҷоми ҷаҳонии футбол бо баргузории маросимҳои ифтитоҳ дар се кишвари мизбон - Амрико, Канада ва Мексика, оғоз мешавад. Ин рақобатҳо, ки барои нахустин бор бо ҳузури 48 тим баргузор хоҳад шуд, бузургтарин давраи таърихи Ҷоми ҷаҳонӣ ба шумор меравад ва дар маҷмуъ 104 мусобиқаро дар 16 шаҳри гуногун мизбонӣ хоҳад кард.

Ин мусобиқаи бонуфузи ҷаҳонӣ шоми панҷшанбе, 11-уми июн бо дидори ифтитоҳӣ миёни Мексика ва Африқои Ҷанубӣ дар “Мексика Сити” оғоз шуд ва бозӣ бар ҳисоби 2 бар 0 ба ғалабаи дастаи мизбон – Мексика ба поён расид.

Баргузоркунандагони Ҷоми ҷаҳонӣ барои нахустин бор се маросими ифтитоҳи ҳампайвандро дар кишварҳои мизбон тарҳрезӣ кардаанд. Ин барномаҳо бо як мавзуи муштарак, яъне “Қудрати футбол дар муттаҳид сохтани мардум”, баргузор мешавад ва ҳамзамон фарҳанг, ҳувият ва санъати ҳар яке аз кишварҳои мизбон ба намоиш гузошта мешавад.

Марко Балич, таҳиягар ва коргардони ҳунарии чандин маросими ифтитоҳи олимпиада, масъули тарҳрезӣ ва иҷрои ин барномаҳо мебошад.

Мексика нахустин мизбони Ҷоми ҷаҳонии 2026 хоҳад буд. Маросими ифтитоҳ дар Варзишгоҳи “Атстека”-и “Мексико-Сити” бо ҳузури шуморе аз ҳунармандони маъруфи ин кишвар ва иҷрои барномаҳои фарҳангӣ ва мусиқӣ баргузор шуд.

Дар Канада низ маросими ифтитоҳ дар шаҳри Торонто баргузор хоҳад шуд. Ин барнома бо тамаркуз бар гуногуншаклии фарҳангии ин кишвар ва бо ҳузури ҳунармандони шинохташудаи канадоӣ ҳамроҳ хоҳад буд. Тими миллии Канада дар нахустин бозии худ дар хоки ин кишвар, бо Босния ва Гертсогавина рӯбарӯ мешавад.

Амрико низ маросими махсуси худро дар Лос-Анҷелес баргузор мекунад. Баргузоркунандагон гуфтаанд, ки ин маросим бо истифодаи технологияҳои тасвирӣ, мусиқӣ ва фарҳангӣ, намоиши ҷойгоҳи Амрико дар фарҳанг ва санъати муосири ҷаҳонро пешкаш мекунад. Дар идома, тими миллии Амрико нахустин мусобиқаи худро дар баробари Парагвай анҷом медиҳад.

Ҷанни Инфантино, раиси ФИФА, гуфтааст, ки маросимҳои ифтитоҳи Ҷоми ҷаҳонии 2026 кӯшише барои пайванд додани фарҳанг, мусиқӣ ва футбол аст ва ҳамзамон ваҳдати се кишвари мизбон ва миллионҳо мухлисони футбол дар саросари ҷаҳонро таҷассум мекунад.

Ҷоми ҷаҳонии 2026 нахустин давраи ин рақобатҳо бо ҳузури 48 тим хоҳад буд: рақобатҳое, ки интизор меравад аз ҷиҳати теъдоди бозиҳо, тамошобинон ва инъикоси он дар васитаҳои ахбори омма, бузургтарин рӯйдоди таърихи футбол дар ҷаҳон бошад.

Dialog.tj