Фаришта Аббосӣ, пажӯҳишгари бахши Афғонистон дар Дидбони ҳуқуқи башар (Human Rights Watch – HRW) гуфтааст, ки даъвати Комиссияи Аврупо аз ҳайати гурӯҳи террористии Толибон барои ширкат дар гуфтугӯҳои муҳоҷиратӣ, дар замони номуносиб, “пайёми нодуруст”-ро мунтақил мекунад.

Аббосӣ рӯзи 10-уми июн гуфтааст, ки Афғонистон ҳамчунон бо яке аз шадидтарин буҳронҳои ҳуқуқи башарӣ дар ҷаҳон рӯбарӯ аст ва занону духтарон дар ин кишвар таҳти табъиз ва саркӯби ниҳодинашуда қарор доранд.

Ӯ таъкид кардааст, ки ҳар гуна тавофуқи муҳоҷиратӣ бо Толибон метавонад заминасози бозгардондани иҷборӣ ва ихроҷи шаҳрвандони Афғонистон ба кишваре шавад, ки ба гунаи возеҳ ноамн аст.

Фаришта Аббосӣ гуфтааст, ки чунин раванд мумкин аст бо уҳдадориҳои байналмилалии кишварҳо дар тазод бошад: уҳдадориҳое, ки бозгардондани афрод ба маконҳои дар маърази шиканҷа, хатари ҷиддӣ ё рафтори ғайриинсониро манъ мекунад.

Аббосӣ ҳушдор додааст, ки Афғонистон барои бисёре аз шаҳрвандон, ба вижа занон ва духтарон, ба фазое аз маҳдудият, табъиз ва маҳрумияти густарда аз ҳуқуқи асосӣ табдил шудааст.

Ӯ аз ҷомеаи ҷаҳонӣ хостааст, то дар тасмимҳои вобаста бо муҳоҷират ва ҳамкорӣ бо Толибон, вазъияти ҳуқуқи башар ва хатарҳои мавҷуд барои шаҳрвандони Афғонистонро ҷиддӣ дар назар бигиранд.

Dialog.tj