Сухангӯи Вазорати корҳои хориҷаи Русия дар иртибот бо интихоботи охир дар Арманистон изҳор дошт, ки ин интихобот бо фишори бесобиқа бар гурӯҳҳои мухолиф (оппозитсия) ва дахолати кишварҳои ғарбӣ баргузор шуд.

Ба гузориши хабаргузории ТАСС, Мария Захарова рӯзи 10-уми июн дар гуфтугӯе бо “Спутник” таъкид кардааст, ки интихобот дар Арманистон бо фишори бесобиқа аз сӯйи мақомоти ҳоким бар гурӯҳҳои мухолифон ва дахолати кишварҳои ғарбӣ баргузор шуд.

Сухангӯи Вазорати корҳои хориҷаи Русия хотирнишон кард, ки дар тӯли ҳудуди 10 соли гузашта дар Арманистон “қутбисозии бисёр шадид” рух додааст.

Вай дар идома таъкид кард, ки мардуми Арманистон ба таври ошкоро тавсеаи тадриҷии равобити дуҷонибаи Маскав ва Ереван ва идомаи ҳузури Арманистон дар иттиҳодияҳои Авруосиёиро хосторанд.

Ин дипломати аршади рус таъкид кард, ки Русия ҳамвора ба як Арманистони мустақил ва дорои ҳокимият алоқаманд будааст.

Захарова бо ишора ба ин, ки мардуми Арманистон барои шаҳрвандони Русия ҳамчунон “бародар” ҳастанд, изҳор дошт, ки Маскав ба ҳамин далел ҳамеша барои онҳо орзуи сулҳ ва рифоҳ доштааст.

Ба гузориши расонаҳо бар асоси натиҷаи эъломшуда аз сӯи Комиссияи марказии интихоботи Арманистон, ҳизби ҳоким ба раҳбарии Никол Пашинян тавонист ҷойгоҳи худро дар сохтори сиёсии кишвар ҳифз кунад ва аз рақибони аслии худ пеш гузарад.

Натиҷаи интихоботи парлумонии Арманистон бори дигар ҷойгоҳи ин кишварро дар рақобати геопалитикии Русия ва Ғарб дар маркази таваҷҷуҳ қарор додааст. Ҳарчанд ҳизби ҳоким тавонист мавқеияти худро ҳифз кунад, аммо ояндаи равобити Ереван бо Маскав, Ғарб ва ҳамчунин, раванди сулҳ дар Қафқози Ҷанубӣ ҳамчунон ба яке аз муҳимтарин пурсишҳои минтақа табдил шудааст.

Dialog.tj