Си Ҷинпин, раиси ҷумҳури Чин, гуфтааст, ки Пекин ва Пхенян ҳамкориҳои стратегии худро бар пояи баробарӣ ва манофеи муштарак барои “асри нав” тавсеа додаанд.

Хабаргузории “Синхуа”, рӯзи якшанбе, 7-уми июн, гузориш дода, ки Си Ҷинпин ин изҳоротро дар остонаи сафари худ ба Кореяи Шимолӣ ва дар чаҳорчӯби гуфтугӯҳои дуҷониба матраҳ кардааст.

Бар асоси гузориш, раиси ҷумҳури Чин гуфта, ки равобити ду кишвар дар солҳои охир вориди марҳалаи тозае аз пешрафт ва густариш шуда ва ҳамкориҳо дар ҳавзаҳои мухталиф рушд ёфтааст.

Си Ҷинпин афзудааст: “Дар баробари вазъияти тағйирёбанда ва печидаи байналмилалӣ, Чин ва Кореяи Шимолӣ бар пояи эҳтироми мутақобил ва эътимоди сиёсӣ, мушорикати стратегии худро тавсеа додаанд.”

Раиси ҷумҳури Чин ҳамчунон гуфта, ки ҳамкорӣ дар бахшҳои тиҷорат, энергетика, илм ва фанноварӣ, табодулоти мардумӣ ва лоиҳаҳои минтақаӣ идома ёфта ва равобит миёни ду кишвар мустаҳкамтар шудааст.

Dialog.tj