Доналд Трамп, раиси ҷумҳури Амрико гуфтааст, ки дар бораи эҳтимоли фурӯши таслиҳоти низомӣ, бо Лай Чинг-те, раиси ҷумҳури Тайван гуфтугӯ хоҳад кард.

Расонаи “Би-би-сӣ”, рӯзи панҷшанбе, 21-уми май гузориш додааст, ки Доналд Трамп ин мавзуъро чанд рӯз пас аз сафар ба Чин эълом кардааст.

Бар асоси гузориш, тасмими раиси ҷумҳури Амрико метавонад фосилагирии ошкор аз суннати дипломатии чанд даҳаи гузаштаи Иёлоти Муттаҳида бошад.

Раҳбарони Амрико ва Тайван аз соли 1979 то кунун ба таври мустақим бо якдигар гуфтугӯ накардаанд: соле, ки Вашингтон равобити расмии худро бо Тайван қатъ кард, то давлати Чинро ба расмият бишносад.

Чин Тайванро бахше аз қаламрави худ медонад ва ҳаргиз истифода аз зурро барои тасарруфи он рад накардааст.

Иёлоти Муттаҳида муддатҳост аз Тайван ҳимоят мекунад, аммо ҳамзамон бояд миёни ин ҳимоят ва ҳифзи равобити дипломатӣ бо Чин тавозун барқарор кунад.

Доналд Трамп пас аз нишасти дурӯзаи ҳафтаи гузашта дар Пекин равобити худро бо Си Ҷинпин, раиси ҷумҳури Чин, “фавқулода” тавсиф карда буд.

Бо ин ҳол, дар ҷараёни сафари Трамп ба Пекин, Чин ошкоро эълом карда буд, ки масъалаи Тайван яке аз муҳимтарин мавзуъҳо дар равобиташ бо Амрико аст ва Си Ҷинпин ҳушдор дода буд, агар ин масъала мудирияти бад шавад, метавонад миёни ду абарқудрат “даргирӣ” эҷод кунад.

Dialog.tj