Расонаҳои Афғонистон дар такя ба манобеи маҳаллии худ навиштаанд, ки дар вилояти Бомиёни Афғонистон гурӯҳи террористии Толибон масъулон ва кормандони Институти илмҳои тандурустии “Борон”-ро бори дувум боздошт карда ва ин маркази омӯзиширо бастаанд.

Манобеи ин расонаҳо рӯзи 20-уми май гуфтаанд, ки истихбороти Толибон рӯзи 18-уми май бо ҳуҷум ба ин институт дар маркази Бомиён, Навид Музаффарӣ, яке аз муассисони ин марказ ва бархе ҳамкорони он, аз ҷумла Абдулҳақ Шафақ, мудири коргузорӣ ва Муҳаммадҳасан Акбарӣ, мудири таълимро боздошт кардаанд.

Ба гуфтаи манобеи расонаҳо, дар ҷараёни ин ҳаҷум ҳафт нафар аз устодон ва низ доктор Алӣ Наҷафӣ, раиси ин институт боздошт шуда ва чанд соат баъдтар озод шудаанд.

Бо ин ҳол, то кунун аз сарнавишти дигари боздоштшудагон иттилое дода нашудааст.

Институти илмҳои тандурустии “Борон” дар минтақаи Пушти Майдон, дар наздикии майдони ҳавоии Бомиёни Афғонистон фаъолият дошта ва дар ин кишвар яке аз нодиртарин марказҳои омӯзишӣ, ки ба духтарон дар риштаҳои илмҳои тандурустӣ омӯзиш медод, ба ҳисоб меравад.

Ин нахустин бор нест, ки Толибон ин маркази омӯзиширо ҳадаф қарор медиҳанд.

Толибон пас аз тасаллути дубора бар Афғонистон, маҳдудиятҳои густурдаеро бар омӯзиши духтарон ҷорӣ кардаанд ва дар моҳҳои охир фишор бар ниҳодҳои омӯзишии фаъол дар бахши омӯзиши духтарон дар Афғонистон афзоиш ёфтааст.

Dialog.tj