Дэвид Фернандес Пуяна, коршиноси ҳуқуқи башар, сулҳ ва ҳалли низоъҳои Созмони Милал, мегӯяд Афғонистон ба як низоми иҷтимоии нав бар асоси ҳокимияти қонун, адолат, ҷавобгӯ ва ниҳодҳои қудратманди дур аз фасод ниёз дорад.

Дэвид Пуяна ин суханонро рӯзи душанбе, 11-уми май дар нишасте таҳти унвони “Дар ҷустуҷӯи адолат, ҳақиқатёбӣ ва ваҳдат; асосҳои эҳёи ҳокимияти қонун дар Афғонистон” дар Женева баён кард.

Ӯ гуфт, ки як қонуни асосии нав, ки мавриди тавофуқи ҳамаи тарафҳои Афғонистон бошад, метавонад роҳе барои эҷоди субот ва амният дар ин кишвар ва минтақа бошад.

Вай ҳамчунин, таъкид кард, ки омӯзиш барои сулҳ ва ҳамзистӣ бояд дар авлавият қарор гирад ва арзишҳое монанди эҳтиром ба зиндагӣ, каромати инсонӣ ва ҳуқуқи башар аз усули асосии сулҳ ва ҳамзистии ҷаҳонӣ ҳастанд.

Пуяна афзуд: “Бо вуҷуди заъиф шудани ҳуқуқи занон ва духтарон ва номушаххас будани ояндаи Афғонистон, гуфтугӯи сиёсӣ, адолат ва сулҳсозӣ бояд бахшҳои ҷудоинопазири музокироти байниафғонӣ бошанд, то барои шаклгирии дубораи Афғонистони сулҳомез замина фароҳам шавад”.

Дар ин нишаст, мавзуи эҷоди механизми мустақили ҷавобгӯ дар Афғонистон, адолат ва баҳс дар бораи ташкили ҳукумати фарогир низ мавриди баррасӣ қарор гирифт.

Dialog.tj